Li Efrînê jiyan li jinan bûye dojeh

Piştî dagirkirina Efrînê di 18`ê Adara 2018`an de, bi sed hezaran şêniyên herêmê koçberî Şehbayê bûn.

Lê beşek şêniyan li Efrînê man. Di 5 salên dagirkeriyê de li dijî wan her cure sûc tên kirin. Jinên efrînê jî para xwe ji van sûcan girtin.

Ew sûc ji aliyê rêxistinên cuda ve bi rapor û daneyan hatine belgekirin, lê belê hê jî gelek kiryarên hovane yên dagirkeran nehatine belgekirin.

DI 5 SALAN DE QETILKIRIN Û REVANDINA JINAN LI EFRÎNÊ

Li gorî daneyên Rêxistina Mafên Mirovan a Efrîn-Sûriyeyê, di salên 2018 (piştî dagirkirina Efrînê) û 2019`an de, 59 jin hatine kuştin, 200 jin hatine revandin. Di nava wan jinan de gelek jinên ciwan jî hene.

Di 2020`an de 9 jin hatine kuştin, 92 jin hatine revandin.

Di 2021`an de 14 jin hatin kuştin, 82 jin hatine revandin.

Di 2022`yan de 13 jin hatine kuştin, 49 jin jî hatine revandin.

Ji destpêka 2023`yan de jî 7 jin hatine revandin.

Aqûbeta gelek jinan hê jî nayê zanîn.

Li kêleka sûcên kuştin û revandinê, jin ji aliyê dagirkeran ve rastî her cure zext, tundî û îşkenceya fîzîkî û derûnî tên.

NAVENDÊN KUŞTIN, ÎŞKENCE Û GIRTINA JINAN

Li gorî zanyariyên ji Rêxistina Mafên Mirovan a Efrîn-Sûriyeyê û çavkaniyên taybet hatine bidestxistin, li Efrînê bi dehan navendên kuştin, îşkence û girtinê hene. Ji wan navendên ku tê de jin jî tên ragirtin ev in :

*Girtîgeha “Meclisa Qanûnsaz a berê” li navenda bajêr e. Bi navê girtîgeha jinan tê naskirin. Jinên hatine revandin di jêrzemîna avahiyê de têne girtin. Nêzî 50 jin di wê girtîgehê de hene. Serçeteyên komên çeteyan û îstixbarata dewleta Tirk, jinên ku hatine revandin wek “Emanat” bi nav dikin û ji wan re derfet hatiye dayîn ku ji 10 heta 30 jinan bikujin.

*Girtîgeha “El Mehkemê” li avahiya dadgehê ya berê ye. Tê de jinên ji navçeyên Efrînê hatine revandin, tên ragirtin. Ev girtîgeh ji aliyê çeteyên Cebha El Şamiyê ve tê birêvebirin.

*Girtîgeha “El Mehmûdiyê” ji aliyê çeteyên El Hemze ve tê birêvebirin. Tê de 2 odeyên taybet ên jinan hene.

*Girtîgeha dibistana “El Keramê” ku dibistana herî kevn a Efrînê ye. Çeteyên Feyleq El Şam ew dibistan kir girtîgeh û tê de beşeke taybet a jinan heye.

*Girtîgeha “Basûtê” ku bi navê “Girtîgeha Qela” tê naskirin. Li nêzî bajarê Efrînê ye. Ji aliyê çeteyên Firqeya El Hemze ve tê birêvebirin. Di bin çavdêriya yekser a îstixbarata dewleta Tirk de ye. Bi dehan jin tê de hene.

(cx)

ANHA