Bi serdana gorên şehîdan çalakiyên 12′yê Adarê dest pê kirin

Pêkhateyên Bakur û Rojhilatê Sûriyeyê salvegera 19′an a komkujî û Serhildana 12′yê Adarê bi serdana ji gorên şehîdan re bi bîr anî.

NÛÇE

12 adar, 2023 10:37

QAMIŞLO

Bi sedan şêniyên pêkhateyên Kurd û Ereb li goristana taxa Qidorbeg a Qamişloyê kom bûn û şehîdên komkujiyê û Serhildana 12′yê Adarê bi bîr anîn.

Li wir endama Partiya Yekitiya Demokratîk (PYD) ya Qamişloyê Hesne Remo axivî û şehîdên serhildanê û tevahî şehîdên tevgera azadiyê bi bîr anîn.

Li ser armancên komploya ku di 2004′an de li dijî gelê Kurd pêk hatiye, Hesne wiha got: "Rejîma Sûriyeyê hewl da fîtneyeke mezin derxe û projeyên xwe li dijî gelê Kurd pêk bîne. Lê bi saya yekitî, hevgirtin û ruhê serhildanê planên wê bi bin ketin. Li ser gorên şehîdên serhildanê îro hemû pêkhate di bin sîwana biratiya gelan û neteweya demokratîk ku Rêber Abdullah Ocalan pêşkêş kiriye kom bûne."

Hese di dawiyê de soz da şehîdên komkujiyê, Serhildana Qamişlo û tevahî şehîdan ku heta rizgarkirina gelan li ser şopa wan bin.

GORISTANA ŞEHÎD DELÎL SARÛXAN

Bi dehan şênî û malbatên şehîdan berê xwe da Goristana Şehîd Delîl Sarûxan. Li wir endamê PYD′ê Şerîf Hecî Mehmûd axivî û got serhildan bû bingeha Şoreşa 19′ê Tîrmehê.

Mehmûd wiha domand: "Tiştê li Qamişloyê û yê li dijî mafên gelê Kurd pêk hatiye, dewleta Tirk li Bakurê Kurdistanê li dijî Amedsporê pêk tîne û armanc heman e ku fîtneyê di nava gelan de derxin."

Mehmûd wiha gotina xwe bi dawî kir: "Şoreşa 19′ê Tîrmehê îsbat kir ku Sûriye ya hemû pêkhateyan e û dê şêniyên Bakur û Rojhilatê Sûriyeyê li hember fîtneyan tê bikoşin û Sûriyeyek demokratîk a nenavendî ava bikin."

YARÎGEHA 12′YÊ ADARÊ

Piştre girseya gel berê xwe da Yarîgeha Şehîdên 12′yê Adarê. Li wê yarîgehê komkujiyek pêk hat û veguherî serhildanekê û li tevahî herêmên Rojava, Heleb, Şam û Reqayê belav bû.

Li qada Yarîgeha Şehîdên 12′yê Adarê merasîma salvegera 19′an a komkujî û Serhildana Qamişloyê dest pê kir. Rêveberiya Xweseriya Demokratîk a Herêma Cizîrê bi diruşma "Bi rihê Serhildana 12′yê Adarê em ê dagirkeriyê têk bibin û bi vîna gelan em ê bi ser bikevin" merasîm li dar xist. Şandeyên ji bajar û navçeyên cuda yên herêma Cizîrê û girseya şêniyên serdana gorên li taxa Qidorbegê û Goristana Şehîd Delîl Sarûxan kiribûn, beşdar bûn.

Her wiha di merasîmê de pêkhateyên herêma Cizîrê û Dêrazorê yên ji Kurd, Ereb, Suryan û Ermen, nûnerên ji saziyên siyasî, sivîl, jin, ol, ciwan û nûnerên ji Rêveberiya Xweseriya Demokratîk a Herêma Cizîrê, şêx û rûspiyên eşîran û tîmên herêma Cizîrê û Dêrazorê beşdar bûn.

Merasîm bi mûzîka ji hêla koma Serdemê ve û sirûda Kurdî Ey Reqîb dest pê kir. Dûre li ser navê Rêveberiya Xweseriya Demokratîk a Herêma Cizîrê, Meclisa Malbatên Şehîdan a Qamişloyê û Kongra Star axaftin hatin kirin.

Tê payîn tîmên Dêrazor û Cizîrê maçekê bilîzin.

(fr)

ANHA