Ji bo Raperîn Amed merasîma sersaxiyê

Merasîma sersaxiyê li Navenda Şehîd Bawer a Tevgera Ciwanên Şoreşger a Sûriyeyê ya li Dêrikê hat lidarxistin û bi sedan şênî û endamên saziyên Rêveberiya Xweser beşdarê bûn.

Di merasîmê de Hevseroka Meclisa Malbatên Şehîdan a Herêma Cizîrê Selma Xelîl axivî û behsa welatparêzî û têkoşîna malbata şehîd Raperîn a di oxira doza Kurd de kir.

Selma anî ziman ku şehîd Raperîn rastiya jina têkoşîner ku berxwedana Zindana Amedê ya Bakurê Kurdistanê û felsefeya Rêber Abdullah Ocalan ji xwe re esas gitiye, temsîl kir.

Selma got ku şehîd Raperîn her tim li qadan bû, jin û civak li ser projeya neteweya demokratîk a Rêber Ocalan bi rêxistin dikirin û di oxira azadiya jinan de têkoşiya.

Selma Xelîl di dawiya axaftina xwe de got: "Şensê me hebû ku em bibin şagirtên şehîd Raperîn. Şehîd Raperîn her tim digot 'divê em jinê ji koletiyê rizgar bikin û li ser xeta şehîdan bi pêş bixin'. Tolhildana ji bo şehîd Raperîn, soz û erka tevahî jinan e."

Hevserokê Meclisa Rêveber a Rêveberiya Xweseriya Demokratîk a Herêma Cizîrê Telat Yûnis jî destnîşan kir ku şehîd Raperîn fermandar û sembola jina azad bû û wiha dom kir: “Tu carî koletî qebûl nedikir. Ji bo civaka ku rastî qirkirin û paşguhkirinê dihat, xwe feda kir.”

Yûnis her wiha bal kişand ser rola şehîd Raperîn di birêxistina civakê di nava komîn û meclisên gel de.

Piştî axaftinan wesîqeya şehîd Raperîn Amed hate xwend û radestî dayikên şehîdan ên Dêrikê hate kirin.

Li gorî daxuyaniya PKK`ê, Delal Ezîzoglu (Raperîn Amed) 17′ê Hezîranê di êrişên artêşa Tirk a dagirker ên li dijî Herêmên Parastinê yên Medyayê de şehîd bû.

(fr/cx)

ANHA