​​​​​​​Şêniyên Efrînê şehîd Gîvara Efrîn oxir kir

Bi hezaran şêniyên herêma Efrînê cenazeyê şervanê YPG′ê Îmad Mihemed (Gîvara Efrîn) ji Nexweşxaneya Avrîn a li Fafînê ya Şehbayê wergirt.

Şênî bi karwaneke ji sedan erebeyan ber bi Goristana Şehîdên Berxwedana Serdemê ya li navçeya Ehrezê ya Şehbayê ve kete rê.

Li goristanê, endama rêveber a Meclisa Malbatên Şehîdan a Herêma Efrînê Xedîce Îbo sersaxî ji malbata şehîd Gîvara re xwest û wiha got: "Bi saya fedekariyên şehîdan û şehîd Gîvara em dibînin ku projeyên me yên demokratîk û biratiya gelan ber bi armanca xwe diçe."

Xedîce wiha domand: "Beriya 15 roj, erdhejeke dijwar li herêmê çêbû, di encamê de bi deh hezaran welatî li Bakurê Kurdistanê û Sûriyeyê jiyana xwe ji dest da. Para Cindirêsê jî mezin bû. Ji lew re dewleta Tirk a dagirker lez kir û deriyên sînor girtin, nehişt alîkarî û alên mezin derbasî herêmê bin. Di encamê de gelek kes di bin enqazan de man û jiyana xwe ji dest da."

Xedîce Îbo wiha pê de çû: "Dewleta Tirk a dagirker ev karesata mirovî ji bo xizmetkirina projeya xwe ya dagirkirinê bi kar anî. Nehişt alîkariya şêniyên resen ên di bin kavilan de mane were kirin û rê li pêş komeleyên Qeterî û hwd vekir ku avahiyên mêtingehiyê di bin perdeya dabînkirina cih ji mexdûran re ava bikin."

Xedîce wiha dawî li gotina xwe anî: "Hemû planên dewleta Tirk a dagirker û bikaranîna karesatan ji bo projeya xwe ya dagirkirinê dê bi ruhê berxwedan û têkoşînê bi bin bikevin."

Li aliyekî din jî endamê Meclisa Kantona Efrînê-Şehba Mihemed Weysî dorpêça ji hêla hikumeta Şamê ve li dijî kantona Şehba, taxên Eşrefiyê û Şêxmeqsûdê şermezar kir û wihagot: "Ji herêmên zirar ji ber erdhejê dîtine, kantona Şehba, taxên Eşrefiyê û Şêxmeqsûdê ne. Ji lew pêwîst e alîkarî bi awayekî lezgîn derbasî kantonê bin. Lê ew yek, bi sedema dorpêça bendên kontrolê yên hikumeta Şamê, pêk nehat."

Dûre wesîqeya şehadetê hate xwendin û radestî malbatê hate kirin.

(fr)

ANHA