Dewleta Tirk gef li şandeya ku hewl da alîkariyê derbas bike xwar

Rêveberiya Xweser a Bakur û Rojhilatê Sûriyeyê ji bo mexdûrên erdhejê yên li Şehbayê, taxên Şêxmeqsûd û Eşrefiyê yên Helebê, herêmên hikumeta Şamê û yên dagirkirî kampanyaya alîkariyê ragihand.

10ʹê Sibatê, Rêveberiya Xweser 50 tankerên mazotê amade kirin da ku bişîne Şehba û Helebê. Lê hikumeta Şamê tanker li deriyê Tayiheyê yê di navbera Minbic û herêmên hikumeta Şamê de asteng kirin. Dîsa jî Rêveberiya Xweser 50 tankerên din ên sotemeniyê bi rê kirin. Lê heta niha 100 tanker li deriyê Tayiheyê hatine astengkirin û li benda derbasbûnê ne.

LI DERIYÊ UM CILÛD JÎ ALÎKARÎ HATINE ASTENGKIRIN

8ʹê Sibatê Rêveberiya Xweser hewl da 30 tankerên sotemeniyê û 20 kamyonên madeyên mirovî bişîne herêmên dagirkirî. Ev alîkarî jî li deriyê Um Cilûd ê di navbera Minbic û Cerablusê de ji aliyê dewleta Tirk û çeteyên wê ve hatin astengkirin û rê nayê dayîn ku derbas bibin.

Ji bo ku ev alîkarî derbas bidin, duh (yekşemê) nûnerên Rêveberiya Xweser bi şandeyeke navbeynkar a ji herêmên dagirkirî hatî re hevdîtin kir. Lê piştî ku şande ji bajarokê Raî yê dagirkirî vegeriya, derbaskirina alîkariyan ji bo herêmên bakur û rojavayê Sûriyeyê red kir.

Hevserokê Daîreya Ragihandinê ya Rêveberiya Xweser a Bakur û Rojhilatê Sûriyeyê Ciwan Mele Îbrahîm diyar kir ku dewleta Tirk a dagirker gef li şandeya navbeynar xwariye ku hewl da alîkariyê derbasî herêmên dagirkirî bike.

(bb)

ANHA