135 cangoriyên azadiyê li Hesekê hatin bibîranîn

Meclisa Malbatên Şehîdan a bajarê Hesekê merasîmê bîranîna 135 şehîdên meha Çileyê, di nav de şehîdên Pêngava Gurzê Gelan li dar xist.

Di Pêngava Gurzê Gelan a ku QSDʹê 20ʹê Çileya 2022ʹyan li dijî êrişa çeteyên DAIŞʹê ya li ser girtîgeha Sînaa ya Hesekê ragihdibûn de 121 sivîl, şervan û karkerên girtîgehê şehîd bûn.

Merasîm bi beşdarbûna bi sedan malbatên şehîdan, endamên saziyên sivîl û leşkerî li Hola Reşo ya li taxa Mişêrfê ya Hesekê hat lidarxistin.

Di merasîmê de endamê Meclisa Malbatên Şehîdan a bajarê Hesekê Cemal Ebdo şehîdên azadiyê bi bîr anîn û got: "Şehadet heqîqet e. Em malbatên şehîdan divê em li ser xeta şehîdan bimeşin, nirx û destkeftiyên ku bi destxistine biparêzin û armancên wan bi cih bînin."

Ji fermandarên Meclisa Leşkerî ya Hesekê Hemîd Hesen jî got: "Em ne aşiqê xwîn û şeran in. Armanca me jiyaneke azad û bi rûmet bijîn."

Hesen anî ziman ku ew ê bi hemû hêza xwe xaka xwe biparêzin û wiha domand: "Her çi qasî dijmin êrişên xwe li ser herêmê zêde bike, nikare îradeya me lawaz bike. Em ji çekên wê natirsin. Em ê bi hemû hêza xwe xak û herêmên xwe biparêzin."

Piştre sînevîzyonek li ser nirxandinên rêber Abdullah Ocalan ên der barê şehîdan de û wêneyên 135 şehîdan hat pêşandan.

(bb)

ANHA