Li Dêrikê Ebdurehman Hisên Hesam hate oxirkirin

Bi sedan şêniyan cenazeyê Ebdurehman Hisên Hesam ku di êrişa hewayî ya dewleta Tirk a dagirker a li ser rêya Qamişlo-Dêrikê de birîndar bûbû û piştre şehîd bû, li Goristana Şehîd Xebat Dêrik oxir kir.

NÛÇE

25 ÇILE, 2023 12:32

QAMIŞLO

Bi sedan şêniyên Girkê Legê, Dêrik, Çilaxa û Til Koçerê yên Qamişloyê beşdarî merasîma oxirkirina welatiyê bi navê Ebdurehman Hisên Hesam bûn.

Hesam di 18′ê Çileyê de, di êrişa balafireke bêmirov a dewleta Tirk a dagirker a li dijî erebeyekê li ser rêya Qamişlo-Dêrikê de li çerxerêya gundê Maşûq ê li nêzî Rawestgeha Arî birîndar bûbû û duh ji ber birînên xwe yên giran şehîd bû.

Di merasîmê de endamê Meclisa Malbatên Şehîdan a Dêrikê Elî Oryan axivî û wiha got: "Em li Rojava li ser rêça şehîdan in û pêdiviya parastina Rojava ji hemû pêkhateyan heye ku planên dewleta Tirk a dagirker têk bibin."

Li aliyekî din jî endamê Tevgera Civaka Demokratîk (TEV-DEM) Hisên Şerfî wiha got: "Em bombebaranên balafirên bêmirov ên dewleta Tirk a dagirker qebûl nakin. Dê armanca me jî li hemberî vê yekê berxwedan be."

Di dawiyê de Meclisa Malbatên Şehîdan wesîqeya şehîd xwend û radestî malbatê kir.

(fr)

ANHA