Li Hesekê merasîma sersaxiyê ya şehîd Hela Serêkaniyê

Meclisa Malbatên Şehîdan konê sersaxiyê yê şehîd Ebîr Fayiz Hemîd (Hela Serêkaniyê) li pêşiya mala wê ya li Kampa Serêkaniyê ya li Hesekê danî. Endamên sazî, meclisên sivîl û leşkerî û saziyên li her du Kampên Serêkaniyê û Waşûkanî beşdarî merasîma sersaxiyê bûn.

Di merasîmê de piştî deqeya rêzgirtinê, endama Meclisa Malbatên Şehîdan a Kampa Serêkaniyê Xezalê Dawûd axivî û diyar kir ku dewleta Tirk a dagirker bi hemû rêbazan hewl dide îradeya gelên Bakur û Rojhilatê Sûriyê têk bibe û anî ziman ku ew ê li hember wê yekê têkoşînê bilind bikin.

Endamê Fermandariya Hêzên Sûriya Demokratîk (QSD) Mistefa Şerîf jî sersaxî ji malbata şehîd re xwest û hemû şehîdên azadiyê bi bîr anîn. Şerîf soza şopandina rêya şehîdan heta avakirina Sûriyeyek demokratîk, fedral û azad da.

Endama Kongra Star a Kampa Serêkaniyê Amne Ehmed jî bal kişand ser têkoşîna şehîd Hele ya di oxira azadiya jinan û parastina gelên herêmê de.

Merasîma sersaxiyê bi dirûşmeyên mîna “Bê serok jiyan nabe” û “Şehîd Namirin” bi dawî bû.

(cx)

ANHA