Şêniyên Til Temirê: Em li hember êrişên dewleta Tirk piştgiriya hêzên xwe dikin

Ji dema dagirkeriya Tirk hatiye nêzî navçeya Til Temirê ya Hesekê, piştî dagirkirina Serêkaniyê di dawiya 2019′an de Til Temir ji hêla wê û çeteyên wê ve rojane tê topbarankirin.

Welatiya bi navê Meryem Ebdullah Mihemed li ser mijarê wiha got: "Dagirkeriya Tirk û çeteyên wê rojane Bakur û Rojhilatê Sûriyê dikin hedef, bi taybet Til Temir. Lê ev yek bandorê li berxwedan û têkoşîna me nake û li gel me hêza parastina xaka me heye.”

Meryemê wiha domand: "Dê hemû êrişên dagirkeriya Tirk û çeteyên wê werin têkbirin, ji ber xwediyê mafê ne û xwediyê vê xakê ne. Lê êrişên berdewam nîşaneya lawaziya dagirkeriya Tirk in. Armanc dagirkeriya Tirk û çeteyên wê ji van êrişan koçberkirina şêniyên herêmê û pergendebûna wan e. Lê li gel me hêz heye û em ê parastina vê xakê bikin û li gel hêzên xwe yên leşkerî bisekinin ku van êrişan têk bibin."

Welatiyê bi navê Ehmed Hemo Hesen wiha got: "Hemû pêkhateyên Til Temirê hevgirtî ne û amade ne bersiva êrişên dagirkeriya Tirk û çeteyên wê bidin û alîkariya hêzên xwe yên leşkerî bikin. Em satirên axê lê dikin da ku parastina xwe bikin û êrişan têk bibin."

Hesan bang li Koalîsyona Navneteweyî û hêzên Rûsyayê kir ku sînorekê ji van êrişan re deynin û wiha domand: "Divê dagirkeriya Tirk û çeteyên wê ji axa me derxin û sînorekê ji êrişên wan ên rojane li ser herêmê me re, deynin."

Li dawiyê jî, welatiya bi navê Emel Seîd El Ehmed wiha got: "Em êrişên dagirkeriya Tirk û çeteyên wê li ser herêmên me qebûl nakin. Em li ser axa xwe ne û jiyana xwe dewam dikin. Zarokên me, ruxmî topên dagirkeriya Tirk û çeteyên wê, dibistanên xwe dewam dikin. Em şêniyên Til Temirê piştgiriya hev dikin, xendekan li malên xwe çêdikin, da ku di dema êrişan de xwe tê de veşêrin û amade ne li hember êrişan bisekinin."

(fr)

ANHA