Tevî dorpêça leşkeran cenazeyê Nagîhan Akarselê bi dirûşma ‘Jin jiyan azadî’ hat veşartin

Endama Navenda Lêkolînên Jineolojiyê, akademîsyen û rojnameger Nagîhan Akarsel di 4’ê Cotmehê de li bajarê Silêmaniye yê Herêma Federal a Kurdistanê di encama êrieke sûîqestê de hat qetilkirin.

Li gorî ANF`ê cenazeyê NagîhanAkarsel îro di danê sibehê de anîn nexweşxaneya bajêr a Konyayê. Malbata Nagîhan Akarsel, piştî kar û barên otopsiyê cenaze wergirt û anîn gundê Golyazi (Xelîkan) ê Cîhanbeylî yê Konyayê ku li wir ji dayik bûye. Cenaze, bi tililiyên jinan hat pêşwazîkirin û jinan li ser milên xwe ew birin goristana gund.

'ÊM Ê TÊKOŞÎNA NAGÎHANÊ BIDOMÎNIN’

Di dema veşartina cenazeyê de leşkeran hewl dan ku nehêlin wêneyên Nagîhan Akarsel bên rakirin lê jinan li ber xwe dan û bi wêneyên Nagîhan Akarsel meşiyan. Di dema meşê de dovîza “Jin jiyan azadî” hat vekirin, girseyê dirûşm berz kirin û ber bi goristanê ve çû.

Di dema veşartina cenazeyê Nagîhan Akarsel de Berdevka Meclîsa Jinan a Partiya Demokratîk a Gelan (HDP) Ayşe Acar Başaran axivî û wiha got: “Nagîhan, em tevek in. Dibe ku Nagîhan qetil kiribin. Lê belê weke rêhevalên wê, em ê mîrasa wê dewr bigirin û heta dawiyê jî vê têkoşînê bidomînin.”

Tevî dorpêç û astengkirina leşkeran jî wecîbeyên olî hatin kirin û cenazeyê Nagîhan Akarsel bi dirûşma “Jin jiyan azadî” hat veşartin. Jinan, qurnefîl û şalên mor danîn ser gora Nagîhan Akarsel û piştre jî derbasî mala wan bûn.