Şêniyên Hesekê komploya navneteweyî ya li dijî rêber Ocalan şemrezar kir

Bi hezaran şêniyên kantona Hesekê bi meşeke girseyê komploya navneteweyî ya li dijî rêber Abdullah Ocalan  şermezar kir.

Meş ji çerxerêya Kevokê ya taxa Miftî ber bi Navenda Çand û Hunerê ya Xabûr a heman taxê ve dest pê kir. Di meşê de diruşmeyên "Bê serok jiyan nabe" û "Bijî serok Apo" hatin berzkirin. Her wiha pankartên bi nivîsên "Hemû cure xiyanet û komployan têk bibin û rêber Apo azad bikin" hatin vekirin.

Meş li ber Navenda Xabûrê rawestiya. Piştî deqeya rêzgirtin endamê PYDʹê Mihemed Xelef komploya 9ʹê Cotmehê şermezar kir û got: "Bi rihê berxwedana gerîlayên li çiyayên Kurdistanê, bi rihê berxwedana gelê Bakur û Rojhilatê Sûriyê ya li dijî êrişên dewleta Tirk a dagirker em ê dagirkeriyê têk biin û qeyd û qanûnên ku li ser rêbertiya me hatine ferzkirin, bişkînin."

Xelef diyar kir ku armanca komployê têkbirina Kurdan û îmhakirina nasnameya Kurd e û wiha domand: "Tevahî gelên Bakur û Rojhilatê Sûriyê li hemberî planên dewleta Tirk a dagirker xeta berxwedanê hilbijartine heta ku azadiya fîzîkî ya rêber Ocalan misoger bibe."

Hevseroka Meclisa Kantona Hesekê Semer El Ebdullah jî axivî û got: "24 sal di ser komploya navneteweyî ya li dijî rêber Abdullah Ocalan re derbas bûn ku hêzên herêmî û saziyên îstîxbaratê beşdar bûn, ji ber ku rêbertî banga azadî, wekhevî û rakirina zilmê li ser tevahî mirovan dike."

Semer El Ebdullah îşaret pê kir ku rêber Ocalan girtiyekî siyasî ye û mafên wî hene, lê dewleta Tirk van mafan bin pê dike, heman demê CPTʹê erkên xwe li hemberî binpêkirinên li dijî rêber Ocalan ê di girtîgeha Îmraliyê de ragirtiye, bi cih nayîne.

Semer El Ebdullah di dawiya axaftina xwe de bang li civata navneteweyî û rêxistinên mafên mirovan kir ku ji bêdengiya xwe derkevin, tecrîda girankirî ya li ser rêber Ocalan rakirin û azadiya wî ya fîzîkî pêk bînin û got: "Cihê xwezayê yê rêbertî di nava gel û hezkiriyên wî de ye."

Çalakî bi berzkirina diruşmeyên şermezarkirina tecrîdê û banga azadkirina fîzîkî ya rêber Ocalan bi dawî bû.

ANHA