Cenazeyê şehîd Zinar Efrîn li Şehbayê hat oxirkirin

Îro bi hezaran şêniyên herêma Efrînê cenazeyê şervanê HRE, Zinar Efrîn ê ku di qonaxa duyemîn a Berxwedana Serdemê de şehîd bûye, oxir kir.

NÛÇE

3 cotmeh, 2022 16:17

ŞEHBA

Şêniyên herêma Efrînê cenazeyê şehîd Zinar Xelîl (Zinar Efrîn) ji nexweşxaneya Avrîn a navçeya Fafîn a Şehbayê wergirt û ber bi goristana Şehîdên Berxwedana Serdemê ya navçeya Ehresê ve bi rê ketin.

Di destpêka merasîma li goristanê li dar ketiye de endama rêveber a Meclisa Malbatên Şehîdan a Herêma Efrînê, Menal Şêxo sersaxî ji malbata şehîd Zinar Efrîn re xwest û soza meşa li ser şopa şehîdan nû kir.

Menal Şêxo destnîşan kir ku fedakariya şehîdan rê li her planên dagirkeriya Tirk û çeteyên wê yên dagirkirina tevahiya xaka Sûriyê girtin.

Her wiha, endamê Meclisa Kantona Efrînê, Fewzî Mistefa teqez kir ku ew wek şêniyên Efrînê dê heta pêkanîna armancên şehîd ji bo avakirina civakeke demokratîk û derkirina dagirkeriyê, li ser şopa şehîd Zinar Efrîn bin.

Piştre, endama Komîteya Perwerdeya Civaka Demokratîk (KPC-D) ya herêma Efrînê, Rûken Ehmed wesîqeya şehîd Zinar Efrîn xwend û radestî malbata wî kir.

Cenazeyê şehîd bi tilîliyên dayîkan hat oxirkirin.

(mh)

ANHA