Şêniyên kantona Hesekê sersaxî ji malbata şehîd Silava Remedan re xwest

Sibeha îro bi sedan şêniyên kantona Hesekê; Dirbêsiyê, Til Temir û Hesekê berê xwe tev li merasîma sersaxiyê ya şehdî Silava Remadan bûn

Silava Remedan di 1’ê Îlonê de ji ber birînên xwe yên giran di encama êrişa balafireke bêmirov a biçek a dagirkeriya Tirk di 18’ê Tebaxê de li dijî navendeke perwerdeyê li rojavayê Hesekê de, şehîd bûbû.

Konê sersaxiyê ji aliyê Meclisa Malbatên Şehîdan a Dirbêsiyê ve li pêşiya mala şehîd a li taxa rojava ya navçeyê, ji bo pêşwazîkirina şêniyên kantonê û şandeyên Rêveberiya Xweser û hêzên leşkerî û partiyên siyasî, hat vegirtin.

Di merasîma sersaxiyê de endamê Meclisa Malbatên Şehîdan, Mihemed El Xetîb wiha axivî: “Em ji malbata şehîd Silava û malbatên hevalên wê yên ku şehîd bûne re sersaxiyê dixwazin.”

El Xetîb wiha zêde kir: “Dijmin li dijî gelê me yê bêsûc êrişan pêk tîne û welatiyan dikuje, lê ew nikare me ji xaka welatê me dûr bixe, bi îradeya gelê xwe em ê li ber xwe bidin û rê nadin dijmin ku xaka me dagir bike.”

El Xetîb bang li beşdaran kir û got: “Bila em li hember dijmin bibin yek, wê demê ew nikare me têk bibe, em piştgiriyê hêzên xwe bikin û li ber xwe didin. Heta pêkanîna armancên Şoreşa 19’ê Tîrmehê em ê xebatên xwe bidomînin.”

Her wiha, bavê şehîd Silava Remedan, Azad Remedan destnîşan kir ku ew û malbata xwe dê li ser şopa şehîdan bin û destkeftiyên wan biparêzin.

(mh)

ANHA