Yekemîn kongreya jinên Ermen sibê li Hesekê li dar dikeve

Bi dirûşma "Yekitiya Jinên Ermenî piştî qirkirina 107 salan,  xwe di nava Şoreşa Rojava de bi rêxistin dike û xaka Rojava diparêze",  jinên Ermen ên di nava Meclisa Civakî ya Ermenî de amadekariyan dikin ku yekemîn kongreya xwe li dar bixin.

Li gorî endama komîteya amadekar a kongreyê Anahît Qesbiyan, kongre dê di 30’ê Tebaxê (sibe) de li Hesekê li dar bikeve, bi armanca nirxandina xebat û çalakiyên jinên Ermen ên di navbera salên 2019-2022’yan û derxistina encamnameyekê ji pêşniyar û biryarên nû ji bo xizmeta jinên Ermen û ya ku qonaxa niha hewce dike, tê lidarxistin.

Der barê mijarê de endama komîteya amadekar a Kongreya Jinên Ermen, Anahît Qesbiyan ji ajansa me re axivî û wiha got: "Di çarçoveya amadekariyên lidarxistina yekemîn kongreya jinên Ermen de, me nêzî 80 civîn li ser asta Bakur û Rojhilatê Sûriyê li dar xist da ku girîngiya kongreyê û armancên wê ji bo pêkhateya Ermen vebêjin."

Anahît Qesbiyan axaftina xwe wiha domand: "Dema ku me ev civîn li bajar û navçeyên Bakur û Rojhilatê Sûriyê li dar xist, ji ber êrişên dagirkeriya Tirk ên li ser herêmê em rastî gelek zehmetiyan hatin."

Anahît Qesbiyan destnîşan kir ku armanca kongreyê ew e ku jinên Ermen rehên xwe yê resen, ziman, urf û adetên xwe nas bikin û çanda pêkhateya ermen a ku hatiye biçûkxistin jî xurttir bikin û piştgiriyê bidin rêxistinên jinan ên li herêmên Bakur û Rojhilatê Sûriyê.

Li gorî endama komîteyê, biryar e di kongreyê de rêxistin û tevgerên jinan ên Bakur û Rojhilatê Sûriyê beşdar bibin.

 (hs)

ANHA