Jinan li Eyn Îsayê êrişên dewleta Tirk ên li ser Kobanê şermezar kirin

Jinên navçeya Eyn Îsayê û şêniyên kantona Girê Spî ya dagirkirî, bi daxuyaniyekê êrişên dewleta Tirk ên li ser Kobanê şermezar kirin û bang li civaka navneteweyî kir ku li dijî sûcên dewleta Tirk bê deng neminin.

17 tebax, 2022 11:32

EYN ÎSA

Daxuyaniya ku ji aliyê berdevka Mala Jinan Zehra Osman ve hate xwendin, li pêşiya Mala Jinan a navçeya Eyn Îsayê hate dayîn û bi dehan jinên navçeya Eyn Îsayê û jinên koçber ên ji kantona Girê Spî lê amade bûn.

Di destpêka daxuyaniyê de êrişên dewleta Tirk a dagirker ên li ser navenda Kobanê û gundewarên wê hatin şermezarkirin.

Duh kantona Kobanê hatibû bombebarankirin û di encamê de zarokek şehîd bûbû û 4 welatiyên din jî birîndar bûbûn.

Jinan di daxuyaniya xwe de bal kişand ser berxwedanê, dilsoziya bi axê û nehiştina xaka xwe ji bo dagirkeriya Tirk û çeteyên wê yên ku dixwazin bi bombaranê qada dagirkeriya xwe berfireh bikin û gel koçber bikin.

Di dawiya daxuyaniyê de bang li civata navneteweyî û rêxistinên mafên mirovan hat kirin ku destwerdanê bikin û li hember sûcên dewleta Tirk ên li dijî welatiyên herêmê bisekinin da ku dawî li rijandina xwînê bê ku ji ber bombebarana rojane ya dewleta Tirk a li ser herêmên Bakur û Rojhilatê Sûriyê pêk tê.

ANHA