Li Hecînê navenda Dozgeriya Giştî hat vekirin

Komîteya Edaleta Civakî ya Dêrazorê bi armanca hêsankirina xebatên qanûnî û dadgehî, belavkirina zanabûna qanûnên di nava şêniyên herêmê de û pêkanîna edaleta civakî li rojhilatê Dêrzorê, navenda Dozegeriya Giştî li bajarokê Hecînê vekir.

Rûspiyên herêmê, endamên saziyên sivîl, leşkerî, partî û bi dehan şêniyên Hecînê tev li merasîmê vekirina avahiyê bûn.

Di merasîma vekirinê de, nûnerê Meclisa Edaleta Civakî ya Dêrazorê Fayiz Bêk axivî û got: “Ji bo temamkirina hewldanên pêkanîna edaleta civakî, me ev navenda Dozgeriya Giştî li Hecînê vekir. Ev navend dê roleke çalak di belavkirina zanabûna qanûnî de di nav welatiyan de bilîze û dê baweriyê di navbera dadweriyê û welatiyan de xurt bike.”

Bêk di axaftina xwe de soz da ku hewldanên dîtir bikin da ku kar û xebat di vî warî de bi rêk û pêk were meşandin, edalet bi rêbaza wê ya herî rast pêk were.

Hevserokê Meclisa Edaleta Civakî ya Dêrazorê Wehîb El Beşar axivî û got: “Êdî bûyerên li herêmê rû didin li ser kesekî nayê veşartin, bi taybet sûcan ku binesaziya civakê diguherin. Li ser bingeha erkê me yê nîştimanî û ji bo rê li pêşiya sûcê bê girtin, hesab ji sûcdaran bê xwestin, me navenda Dozgeriya Giştî li Hecînê li gorî biryara Meclisa Edaleta Giştî ya Bakur û Rojhilatê Sûriyê vekir.”

El Beşar daxuyand ku Dozgeriya Giştî dê ji bo gelê Hecînê û saziyên wê li hember hemû cureyên genedeliyê û sûcan bibe mertal û dê hesab ji wan bê xwestin.

Serokê Komîteya Têkiliyan a Meclisa Sûriya Demokratîk (MSD) Enes El Merfû axivî û got: “Bi rêya tecrubeyên me, diyar bû ku serkeftina leşkerî bi tenê têrê nake. Îstiqrar bê hebûna edaletê û pêşxistina herêmên zirar dîtine, lidarxistina projeyên aborî û girtina tedbîrên leşkerî, cezayî û edlî pêk nayê.”

El Merfû anî ziman ku vekirina vê navendê, dê bibe hîmanekî sereke ya sepandina ewlehiyê li herêmê bi giştî.

Bi navê Meclisa Herêma Rojhilat a Dêrazorê Saêr El Rebî axivî û vekirina navendê li şêniyên herêmê pîroz kir û got: “Dozgeriya Giştî dê çareserkirina dosyayên cezayî li herêmê hêsan bike û dê edalet li herêmê belav bibe.”

Piştî bidawîbûna axaftinan, dayika şehîd Emîr El Mixlef navend vekir. Hêjeyî bi bîrxistinê ye ku Emîr El Mixlef di pêngava rizgarkirina Dêrazorê ji çeteyên DAIŞ`ê de şehîd bûye.

(şx)

ANHA