​​​​​​​Şêniyên Helebê cenazeyê şehîd Cûdî Amanos veşart

Bi sedan şêniyên taxên Şêxmeqsûd û Eşrefiyê yên Helebê cenazeyê şehîd Cûdî Amanos bi merasîmeke girseyî veşart ku di 12`ê Tîrmehê de di encama qezeyekê de şehîd bûbû.

Destpêkê şênî li pêşiya nexweşaneya Şehîd Xalid Fecir a li rojavayê taxa Şêxmeqsûd kom bûn û cenazeyê şehîd Cûdî Amanos wergirt. Paşê şêniyan bi karwanekî wesayîtan ber bi Goristana Şehîdên Berxwedana taxên Şêxmeqsûd û Eşrefiyê ve ketin rê.

Li goristanê ji fermandarên Yekîneyên Parastina Gel (YPG) a Helebê Şervan Efrîn axivî û îşaret bi fedakariyên YPG û YPJ`ê ji bo rizgarkirina welêt ji dagirkeran kir û got: “Meha Tîrmehê meha berxwedanan û fedakariyan e ku bi berxwedana girtîgehan bi pêşengiya şehîdan Akif Yilmaz, Kemal Pîr, Mihemed Xeyrî Durmuş û Elî Çîçek destpê kir û bi destkeftiyên Şoreşa 19`ê Tîrmehê re bi dawî bû ku bû cewhera avakirina Rêveberiya Xweser.”

Şervan Efrîn teqez kir ku rizgarkirina herêmên dagirkirî armanca wan a sereke ye û soz da şehîd Cûdî Amanos û hevalên wî; dê şopdarên rêya wan bin heta civakeke demokratîk, azad û pirreng ava bibe.

Paşê endama Meclisa Malbatên Şehîdan Remziye Salih axivî û got: “Gelê kurd heta armanca xwe pêk bîne û welatê xwe rizgar bike, dê fedakariyan bike. Bi mezinkirina têkoşînê re, dê xewn û xeyalên şehîdan pêk werin ku di oxira parastina welêt de canê xwe fedak kir.”

Piştre endama Komîteya Perwerdeya Civaka Demokratîk (KPC-D) a Helebê Zekiye Mistefa wîsqeya şehadeta şehîd xwend û radestî malbatê kir.

Di dawiya merasîmê de girseya gel cenazeyê şehîd Cûdî Amanos spart axê.

(şx)

ANHA