Şehîdên Senadîdê bi merasîmekî girseyî hatin oxirkirin

Bi sedan şêniyên navçeya Girkê Legê li qada Azadî kom bûn û cenazeyê şervanê Hêzên Senadîd Riyad El-Mitorî û Zahir El-Belo ku di encama êrişeke çeteyên DAIŞ`ê de li gundewarên navçeya Til Koçer şehîd bûn, wergirt.

Karwanê şehîdan ji Nexweşxaneya Şehîd Hogir a Dêrikê ber bi Goristana Şehîd Uqab El-Eswed a navçeya Til Koçerê ve kete rê.

Li goristanê merasîm bi rêzgirtin dest pê kir û toreneke leşkerî ji aliyê Hêzên Senadîd ve hate lidarxistin.

Di merasîmê de ji fermandarên Hêzên Senadîd Xalid Şahir wiha axivî: "Em li ser xaka xwe li dijî çeteyên DAIŞê`ê li ber xwe didin û di oxira parastina welatê xwe de canê xwe feda dikin. Me soz da gelê xwe ku em ê parasvanên vê xakê bin û pîrozbahiyên civaka xwe biparêzin."

Her wiha Hevserokê Desteya Hundirîn a herêma Cizîrê Kenan Berekat jî sersaxî ji malbata her du şehîdan re xwest û ev tişt anî ziman: "Em sersaxiyê ji gelê xwe yê azadîxwaz re dixwazin ku li hember terorê têdikoşin. Hêzên zilmkar û kesên ku destekê didin wan da ku destkeftiyên gelê me têk bibin."

Berekat destnîşan kir ku hedefgirtina Hêzên Senadîd hedefgirtina projeya demokratîk e.

Paşê wesîqeyên şehîdan hatin xwendin û radestî malbatên wan hate kirin. Di dawiyê de cenazeyên her du şehîdan li Goristana  Şehîd Uqab El-Eswed a Til Koçerê hatin veşartin.

(bx)

ANHA