Li bajarokê Sirînê çalakiya ‘Fezet Eşaîr’ li dar ket

Li bajarokê Sirînê yê Kobanê çalakiya Konê ‘Fezet Eşaîr’ li dar ket. Ev çalakî di çarçoveya çalakiyên eşîran ên li Bakur û Rojhilatê Sûriyê de bi armanca li dijî êrişên dewleta Tirk û gefên wê û piştgiriya QSD`ê, li dar dikeve.

Kon li navenda bajarok hate vegirtin û wêneyên cîgirê Hevserokatiya Meclisa Rêveberiya Xweser a Bakur û Rojhilatê Sûriyê şehîd Ferhad Şiblî lê hatin daliqandin.

Bi sedan rûspî û şêxên eşîrên herêma Firatê, rêveber, endamên saziyên sivîl û leşkerî tev li çalakiyê bûn.

Destpêka çalakiyê endamê Têkiliyên Giştî ya QSD`ê ya Herêma Firatê Ezîz Ehmed axivî û bixêrhatina hemû beşdaran kir, her wiha îşaret bi piştgiriya eşîran ji QSD`ê re kir û got: "Em ê rê nedin dagirker ku xaka Sûriyê qirêjî bikin."

Ezîz Ehmed anî ziman ku cihê kêfxweşiyê ye eşîr di rewşeke wiha zehmet de li dijî êrişên dewleta Tirk a dagirker, piştgiriya xwe ji QSD`ê re nîşan didin.

Nûnerên eşîran jî banga parastina welat ji dagirkeran kir û diyar kir ku hemleyên rizgarkirina Bakur û Rojhilatê Sûriyê ji terora DAIŞ`ê ji bo wan tecrube ye.

(eh)

ANHA