Yekitiyên civaka sivîl ên Minbicê gefên dagirkeriya Tirk şermezar kirin

Endamê Yekitiya Mamosteyan a Minbicê Ebdurehman Hemûd bi beşdarbûna endamên Yekitiya Mamosteyan û Yekitiya Rewşenbîran a Minbicê li navenda Yekitiya Rewşenbîran a li rojavayê Minbicê, daxuyanî xwend. Hevseroka Yekitiya Ajokaran a Minbicê Fatima El-Berho jî li geraca başûrê bajêr bi amadebûna endamên Yekitiya Ajokaran û Yekitiya Kedkaran a Minbicê daxuyanî xwend. Li Nexweşxaneya Firatê jî daxuyanî ji aliyê hevserokê Yekitiya Endezyaran a Minbicê Îsmaîl Qetwan ve tevî amadebûna endamên Yekitiya Endezyaran û Yekitiya Dermanfiroş û Bijîşkan, hat xwendin.

Di daxuyaniyê de hate gotin ku destdirêjî û gefên dewleta Tirk a dagirker li dijî Bakur û Rojhilatê Sûriyê, siyasetên Tirkiyê yên mêtingeriyê û feraseta wê ya sûcan li djî gelên herêmê temsîl dike.

Her wiha hate diyarkirin ku ew ê her tim li kêleka Hêzên Sûriya Demokratîk (QSD) bin, yên ku gel diparêzin û aramî û îstiqrarê li herêmê peyda dikin.

Di daxuyaniyê de îşaret bi gefên nû yên dagirkeriya Tirk hate kirini û hate gotin: “Em van gefan ku armanc jê têkbirina ewlehiyê, talankirina erdê û xêr û bêrên gelê me ye, red dikin. Heta dilopa dawîn a xwîna xwe em ê li dijî vî dijminî li ber xwe bidin.”

Daxuyanî wiha bi dawî bû: “Em bang li hêz û rêxistinên navneteweyî dikin ku li hemberî destdirêjî û diminahiya dewleta Tirk a li dijî herêmê xwedî helwest bin. Em dev ji xaka xwe bernadin, em ê heta rizgarkirina hemû herêmên dagirkirî li ber xwe bidin.”

ANHA