Saziya Êzidîna ji bo zarokên qurbaniyên şer komxebatek li Qamişlo li dar xist

Bi boneya Roja Zarokên Qurbaniyên Şer ku 4`ê Hezîranê ye, Saziya Êzidîna bi hevkariya Heyva Sor a Kurd û Desteya Tenduristiyê ya Herêma Cizîrê komxebatek li hola Zana ya Qamişloyê li dar xist.

Komxebat bi armanca piştgirî ji zarokên qurbaniyên şer û aloziya Sûriyê re bê dayîn û xebatên tenduristiyê ji wan re bên pêşkêşkirin, bi navnîşan “Kulîka Zeytûnê” hate lidarxistin. Endamên Heyva Sor a Kurd, Desteya Tenduristiyê ya herêma Cizîrê û nexweşxaneya dil û çav tev li komxebatê bûn.

Li gorî saziyê zarokên ku dê destekdayîn ji wan re were pêşkêşkirin ji herêmên Serêkaniyê, Girê Spî, Efrîn, Dêrazor, Hesekê û Qamişlo bin. Dê dermankirina piskolojîk û fîzîkî ji wan re were pêşkêşkirin her wiha organên çêkirî, çû, kursî û ava meşê ji wan re bê pêşkirin.

Di komxebatê de hevserokê Heyva Sor a Kurd Hesen Emîn spasiya saziya Êzidîna kir ku û wiha axivî: "Em bi hêvî ne ku ev çalakî sûdê li hemû zarokên Bakur û Rojhilatê Sûriyê bike ku rastî kirinên xirab hatine."

Emîn teqez kir ku Heyva Sor a Kurd amade ye ku destekdayîna tenduristî û alîkarî pêşkêşî zarokan bike, her wiha behsa armancên damezirandina Heyva Sor a Kurd kir û got: "Heyva Sor a Kurd rêxistineke mirovî ya tenduristî ye û ne girêdayî hikumetê ye. Di qada tenduristiyê û alîkariyê de ji gelê Bakur û Rojhilatê Sûriyê re hemû xebatên tenduristiyê û derman bê pere pêşkêş dike."

Paşê serokê Beşa Bijîşkan a Nexweşxaneya Dil û Çav Mihemed Elî Ebdî jî wiha axivî: "Ev şer bandor li zarokan kir ku ji perwerde û fêrkirinê qut bûn. Bi alîkarî û hevgirtina me em ê xebatên tenduristiyê û dermanan ji zarokan û hemû gelên Bakur û Rojhilatê Sûriyê re pêşkêş bikin."

Cîgira Desteya Tenduristiyê ya Rêveberiya Xweser a Herêma Cizîrê Bêrîvan Derwîş spasiya hemû alî û rêxistinên mirovî kir ku destekê didin mafên zarokan li herêmê û ev tişt anî ziman: "Bi vê boneyê em ji cîhanê û aliyên navneteweyî re dibêjin ku zarokên me qurbanê vî şerî û êrişên dewleta Tirk in. Bi sedan zarokên li Rojava û Bakur û Rojhilatê Sûriyê ji ber êrişên dewleta Tirk zehmetî dîtin û dibînin."

Bêrîvan Derwîş bang li rêxistinên hiqûqî kir ku hesab ji dewleta Tirk a dagirker bixwazin.

Koordînatorê Têkiliyan a Rêveberiya Kampa Waşûkanî Riyad Ebdurezaq anî ziman ku praniya zarokên astengdar qurbaniyên şer in û ji rêxistinên navneteweyî xwest ku erka xwe pêk bînin û destekê ji zarokan re pêşkêş bikin.

`PÊŞKÊŞKIRINA XIZMET Û ÇARESERIYAN`

Mudîrê Saziya Êzidîna Elî Îso jî online tev li komxebatê bû û behsa armanca ji binavkirina projeya "Kulîka Zeytûnê" kir û wiha axivî: "Wateya rast a vî navî; aştî û hevgirtina di navbera hemû pêkhateyan de ye."

Îso teqez kir ku yên herî zêde zirarê ji şerê li herêmê dibînin zarok in û wiha dawî li axaftina xwe anî: "Em rêxistinên Civaka Sivîl hewl didin hemû xizmet û çareseriyan bi rêya însiyatîfên tenduristî û alîkariya yekalî pêşkêş bikin."

Di dawiyê de Saziya Êzidîna diyarî li zarokan belav kir.

(bx)

ANHA