Bi boneya Roja Zimanê Kurdî pirtûkxaneyek hate vekirin

Pirtûkxane li avahiya Desteya Perwerde û Fêrkirinê ya Herêma Efrînê ya li navçeya Ehdasê ya kantona Şehbayê bi beşdarbûna bi dehan xwendekar, mamoste û endamên saziyên perwerdeyê hate vekirin.

Di merasîmê vekirinê de, endama rêber a Desteya Perwerde û Fêrkirinê ya Herêma Efrînê Bêrîvan Omer axivî, Roja Zimanê Kurdî û vekirina pirtûkxaneyê pîroz kir û got:  "Ev pirtûkxane dê asyonên zanistê li gel civakê berfireh bike, ji ber ku li dijî civaka me siyasetên qirkirin û asîmîlasyonê têne kirin."

Piştre helbest hatin xwendin û ji aliyê dayikên şehîdan ve pirtûkxane hate vekirin.

Hîndekarê beşê Wêje û Zimanê Kurdî Sadiq Berekat jî armancên vekirina pirtûxaneyê destnîşan kir û got: "Vekirina vê pirtûkxaneyê derfeteke ji bo xwendekar û hizkiriyên xwendinê ye ku di gelek aliyan de dîrok, siyaset û zanistê xwe pêş bixin."

Berekat diyar kir ku di pirtûkxaneyê de beşên dîrok, çandî, zanist, wêje, tenduristî û civakî hene û got: "Em dixwazin bala xwendekar û civakê bikişînin ser xwendinê."

Xwendekarê Peymangeha Şehîd Viyan Amara Siyabend Faqî kêfxweşiya xwe bi vekirina pirtûkxaneyê anî ziman û wiha domand: "Ev pirtûkxane ji bo me lêvegereke, ku em ê di lêkolînên xwe de xwe bispêrênê. Her wiha dikarin çand û dîroka gelên din bi rêya vê pirtûkxaneyê nas bikin."

ANHA