​​​​​​​Rojnamevanekî urdinî: Divê gelên herêmê li hember komkujiyên dewleta Tirk bibin yek

Piştî serdana serokê hikumeta Başûrê Kurdistanê Mesrûr Barzanî ji bo Tirkiyê, dewleta Tirk a dagirker ji 7`ê Nîsanê ve, êrişên herêmên Başûrê Kurdistanê dike. Heman demê êrişên wê yên li ser herêmên Bakur û Rojhilatê Sûriyê dewam dikin.

'KOMKUJIYÊN DEWLETA TIRK DEWAM DIKIN'

Der barê mijarê de rojnamevan û nivîskarê urdinî Redad El-Qelab wiha got: “Dewleta Tirk ji zêdetirî 100 salan ve komkujiyan li dijî gelên herêmê, di nav de Ermen pêk tîne. Ev sûcên wê yên li dijî gelê Kurd jî bi hevkariyeke biguman a civata navneteweyî berdewam in.”

El-Qelab destnîşan kir ku dewleta Tirk hîna komkujiyan li dijî jinên têkoşer ên Tirk didomîne û sûcên hovane li dijî mirovahiyê pêk tîne, siyasetmedaran, kesên temenmezin û zarokan di girtîgehan de digire.

Redad El-Qelab wiha domand: “Li gel van sûcên dewleta Tirk, civata navneteweyî bêdeng e. Tirkiyê li Iraq û Sûriyê serdestiyê wan dewletan binpê dike.”

`JI DEWLETÊN EREB TÊ XWESTIN HELWEST LI HEMBER SÛCÊN TIRKIYÊ NÎŞAN BIDIN`

El-Qelab îşaret pê kir ku dewletên Ereb nikarin sûcên dewleta Tirk a dagirker ên li dijî gelê Kurd ê li Iraqê rawestînin û wiha domand: "Dewleta Tirk ji bo qada xwe li ser hesabê welatên Ereb firehtir bike û kurdan tune bike, hemû cureyên çekan, derfetên xwe yên teknîkî  yên leşkerî, şer û aborî ku ji NATO, pergala rojava û hinek dewletên din wergirtine, bi kar tîne. Ev êrişên ku di meha Remezana pîroz de têne kirin, dijbertiya ometa îslam û ereban e. Qetilkirina musilman û sivîlên Kurd ên bê guneh li dijberî sîstema Tirkiyê ye ya ku pê bang dike.” 

`DIVÊ GELÊN HERÊMÊ LI HEMBER KOMKUJIYÊN TIRKIYÊ BIBIN YEK`

El-Qelab bal kişand ku divê pêkhateyên herêmê yên Kurd, Ereb, Ermen û pêkhateyên din li hember hovîtiya dewleta Tirk û komkujiyên wê yên li dijî gelê Kurd bibin yek û wiha axaftina xwe dewam kir: "Divê Kurd ên li dewletên herêmê bibin yek û li hember êrişên dagirkirinê yên li dijî bakurê Iraqê û bakurê Sûriyê bisekinin. Divê bang li cîhana azad bikin ku êrişên Tirkiyê yên li dijî gelê Kurd rawestîne û Tirkiyê ji ber sûcên li dijî mirovahiyê pêk anîne, muhasebe bike.”

(şx)

ANHA