Şêniyên Kobanê li dijî êrişên dewleta Tirk meşek li dar xist

Bi sedan şêniyên gundewarên rojhilatê kantona Kobanê li gundê Xirabeşkê kom bûn û xwepêşandanek bi armanca şermezarkirina siyaseta Partiya Demokrat a Kurdistanê (PDK) û êrişên dewleta Tirk a dagirker ên li ser çiyayên Kurdistanê li dar xist.

Xwepêşandêran dirûşmên "Bimire xayîn, bimire faşîzma Tirk", "Bijî berxwedana gerîla", "Serkeftin ya gerîla ye” û “Azadî ji bo Rêbertî" berz kirin.

Xwepêşandêran berê xwe da navenda navçeya Çelebiyê û li wir endamê Meclisa Giştî ya Partiya Yekitiya Demokratîk (PYD) Ehmed Xoce bal kişand ser rola gerîla di parastina Kurdan de û xiyaneta PDK'ê ya li dijî Kurdan şermezar kir.

Ehmed Xoce diyar kir ku Komploya Navneteweyî berdewam dike û bi rêbazên cuda hewl didin Kurdan tune bikin. Xoce wiha lê zêde kir: "Partiya Karkerên Kurdistanê (PKK) ji destpêka damezirandina xwe ve ji bo ku gelê Kurd di nava aramî û ewlehiyê de bijî, li hember hêzên serdest tê koşiya û îro dem hatiye ku Kurd piştgiriya PKK'ê bikin da ku bi ser bikevin."

Ehmed Xeco di dawiya axaftina xwe de got dawiya xiyanetê xirab e û kesên ku xiyanetê li doza kurdî bikin, divê vê yekê baş bizanin.

(dx)

ANHA