Li Şehbayê êrişên dagirkeriyê bi meşeke girseyî hatin şermezarkirin

Bi hezaran mamoste, endamên Desteya Çand û Hunerê, Hîlala Zêrîn, Yekitiya Jinên Ciwan a herêma Efrînê li ser rêya di navbera gundê Babinis û navçeya Fafînê ya kantona Şehbayê de kom bû. Di meşê de alên PKK’ê, Tevgera Çand û Hunerê, Hîlala Zêrîn, Tevgera Ciwanên Şoreşer, Yekitiya Jinên Ciwan, wêneyên rêber Ocalan hatin hildan, her wiha pankartên "Werin cenga azadiyê li dijî xiyanetê  û dagirkeriyê", "Gerîla pêşengên me û fedekarên rastîn ên doza Kurdistanê ne" hatin hildan.

Meş ber bi qada Dibistana Ajotinê vey a li navçeya Fafînê ve kete rê, li wir deqeyeke rêz hate girtin, dûvre endamê rêveber ê Tevgera Ciwanên Şoreşger a Herêma Efrînê Reşîd Silêman axivî û berxwedana hêzên gerîla li hember êrişên artêşa Tirk a dagirker silav kir.

Silêman da zanîn ku ciwanên Şehbayê amade ne tev li seferberiya giştî bibin.

Silêman destnîşan kir ku dewleta Tirk a dagirker bi êrişên xwe yên li dijî gerîla ku êdî bi bin ketine, hewl dide nasnameya gelê Kurd têk bibe.

Endamê Meclisa Kantona Şehbayê Ehmed Selame axivî û got hewldanên dagirkeriya Tirk ji bo derxistian fitneyan di navbera pêkhateyên Kurd û Ereb de ye, da ku projeya neteweya demokratîk û biratiya gelan têk bibe.

Selame eşkere kir ku ev gel li ser şopa şehîdan û felsefeya rêber Ocalan dimeşe, bi wê re hewldanên dagirkeriyê bi ser nakevin.

Li aliyekî din jî endama rêveber a Desteya Perwerde û Fêrkirinê ya herêma Efrînê Bêrîvan Xelîl behsa tevkariya PDK’ê bi artêşa Tirk a dagirker di êrişên li dijî Herêmên Parastinê yên Medyayê kir.

Meş bi diruşmên silavkirina berxwedana gerîla û gelê Kurd bi dawî bû.

(fr)

ANHA