Li Çilaxa li dijî siyasetên qirkirinê banga bilindkirina têkoşînê hat kirin

Îro bi hezaran şêniyên navçeya Çilaxa ya girêdayî kantona Qamişlo bi armanca piştgiriya gerîla û şermezarkirina xiyaneta PDK`ê daketin qadan.

Xwepêşandêran ji qada geracê ya navnerasta navçeyê dest bi xwepêşandanê kirin û ber bi bazara navendî ve çûn. Beşdaran wêneyên rêber Abdullah Ocalan, şehîdan û alên PKK`ê rakirin. Her wiha sloganên "Bijî berxwedana gerîla, na ji xiyaneta PDK`ê re" berz kirin.

Li Çerxerêya Şehîd Masûm a li Çilaxa hevserokê Desteya Hundirîn a Herêma Cizîrê Kenan Berekat axivî û berxwedana gerîla li çiyayên Kurdistanê silav kir.

Kenan Berekat diyar kir ku dewleta Tirk a dagirker helwesta navneteweyî bi kar tîne û dixwaze serdema Osmaniyan vejîne û wiha pê de çû: “Lewma doza Kurdî û projeya demokratîk derb dike. Lê ev hewldan bi saya têkoşîn û berxwedana gelan dê têk biçin.”

Hevseroka Meclisa Malbatên Şehîdan a Herêma Cizîrê Hindirîn Sîno jî îşaret bi êrişên dewleta Tirk a dagirker ên li ser Bakur û Rojhilatê Sûriyê, Başûrê Kurdistanê û Şengalê kir û got: "Ev êriş bi armanca bidawîkirina doza kurdî û dagirkirina herêmên din tên kirin. Divê em li dijî siyasetên qirkirinê yên dewleta Tirk a dagirker û şirîkên wê hevgirtina xwe xurt bikin."

Hindirîn Sîno di dawiyê de beşdariya PDK`ê di êrişên artêşa Tirk a dagirker yên li ser Herêmên Parastinê yên Medyayê de şermezar kir û ew bi xiyaneta mezin a gelê Kurd û doza kurdî bi nav kir.

(eh)

ANHA