Êrişên dewleta Tirk li Minbicê hatin şermezarkirin

Li ser banga Rêveberiya Sivîl a Demokratîk a bajarê Minbicê û gundewarê wê, bi sedan şêniyê bajarê Minbicê daketin qadan û êrişên dewleta Tirk ên li ser Bakur û Rojhilatê Sûriyê, şermezar kirin.      

Meş li pêşiya çerxerêya Mîzan a li navenda bajêr dest pê kir û ber bi çerxerêya El- Masab ve ketin rê. Di meşê de pankartên bi nivîsên "Bi rihê berxwedana gelên azad em ê dagirkerî û xayînan têk bibin" û "Bi rihê gerîla em ê faşîzma Tirk têk bibin" hatin vekirin.               

Hevserokê Meclisa Rêveber a Minbicê Mihemed Xêr Şêxo û got: "Di van rojan de dewleta Tirk a dagirker binpêkirinên xwe yên li ser Bakur û Rojhilatê Sûriyê û Herêmên Parastinê yên Medyayê berdewam dike, şêniyên Minbicê bi hemû pêkhate û rêveberiyên xwe ve nerazîbûna xwe li hemberî van binpêkirinan nîşan dan."          

Mihemed Xêr Şêxo di berdewamya axaftina xwe de got: "Dewleta Tirk a dagirker bi hinceta parastina ewlehiya xwe ya neteweyî ya Minbicê û bi armanca şikandina îradeya gelê Minbicê, gundewarên bakurê bajarê Minbicê topbaran dike. Pirs ew e: Gelo wê hedefgirtina sivîlan ewlehiya wê ya neteweyî biparêze?"

Şêxo îşaret pê kir ku dewleta Tirk îdia dike ku dewleteke îslamî ye û di meha Remezanê de Bakur û Rojhilatê Sûriyê û Herêmên Parastinê yên Medyayê topbaran dike û wiha got: " Gelo pîroziya meha Remezanê li ku ye? Roja Înê jî bi roketan bajarê Kobanê kir hedef, lê em wekî gelên Bakur û Rojhilatê Sûriyê helwesta me diyar e, çek biryara me ye, em ê bi yekitiya xwe li ber xwe bidin."

Çalakî bi biduşmeyên silavkirina berxwedana gel û şermezarkirina êrişên dagirkeriyê yên dewleta Tirk.

(dx)

ANHA