Li Şêxmeqsûdê bi hezaran kes li dijî ambargoyê meşiyan

Ambargoya ku Firqeya 4'an a hêzên hikumeta Şamê li ser taxên Şêxmeqsûd û Eşrefiyê yên Helebê dewam dike. Hêzên hikumeta Şamê rê nadin ku derman, ard, madeyên xwarinê û sotemenî derbasî wan taxan bibin.

Li dijî ambargoyê bi hezaran şêniyên Şêxmeqsûd û Eşrefiyê meşek girseyî li dar xist.

Meş bi silogana "Na ji ambargoya li ser taxên Şêxmeqsûd û Eşrefiyê re, na ji siyasetên birçîkirinê re, bijî berxwedana gelên azad " hate lidarxistin.

Di meşê de nûnerên saziyên civakî û partiyên siyasî amade bûn, meş li ber hola civînan li rojavayê taxa Şêxmeqsûd dest pê kir.

Şêniyan pankartên bi nivisînê "Em dixwazin çûn û hatinê di navbera Heleb, Şehba û bajarên din ên Sûriyê de bikin", "Em daxwaza vekişandina bendên kontrolê yên firqeya 4'an ên li derdora taxên Şêxmeqsûd û Eşrefiyê dikin" û "Na ji siyaseta birçîkirinê re" vekirin.

Şênî li nava kolanên taxê geriyan û berê xwe dan benda kontrolê ya bi navê El-Cezîra ya girêdayî Firqeya 4'an. Li wir endamê serokatiya Meclisa Sûriya Demokratîk (MSD) Mirî El-Şibilî axivî, bal kişand ser îdiayên hikumeta Şamê ku ew rê didin ard derbasî taxên Şêxmeqsûd û Eşrefiyê bibin û got:" Divê em van îdiayan bawer nekin. Em ê bi rihê berxwedanê li dijî komplogeran bi ser bikevin."

El-Şibilî diyar kir ku dê şêniyên Şêxmeqsûd û Eşrefiyê serî netewînin û wiha domand:" Ji 10 salan ve hikumeta Şamê kiryarên wiha dide meşandin, lê em nema weke berê ne, em ê bi fikir û îdeolojiya xwe bi ser bikevin."

El-Şibilî anî ziman ku şêniyên taxên Şêxmeqsûd û Eşrefiyê bi Kurd, Ereb û Tirkmenên xwe dê hêza xwe bikin yek û li dijî van kiryaran bisekinin û wiha domand: "Hikumeta Şamê ziman û çanda xwe di bin silogana yek al, yek ziman û yek çarenivîs li ser me ferz dikirin, rê nedidan em fêrî zimanê xwe bibin û bi zimanê xwe biaxivin. Di çend salên borî de çi ji me re kir? Tenê fikrê desthelatdarî pêşkêş kir, binpêkirin li dijî me kir, lê em bê deng neman û me rewş guhert."

Endamê serokatiya Meclisa Sûriya Demokratîk MSD Mirî El-Şibilî  got, hikعmeta Şamê bi siyaseta birçîkirinê dixwaze gel bin dest bike û got: "Mijar ne mijara nan û ard e, lê hikumet dixwaze em serî bitewînin,  lê em serî natewînin."

"BERÊ ÇEKÊN XWE BIDIN HERÊMÊN DAGIKIRÎ"

El-Şibilî da zanîn ku şêniyên Şêxmeqsûd û Eşrefiyê bi biçûk û mezinên xwe ji bilî jiyaneke bi rûmet û azad tiştekî din naxwazin û anî ziman "Dema şer giran bû me zarokên xwe dan, wê demê Firqeya 4'an li kuderê bû?"

Mirî El-Şibilî bang li Firqeya 4'an kir "Rêya Colan di Şêxmeqsûdê re derbas nabe. Gelek herêmên Sûriyê hatine dagirkirin, berê çek û tivinga xwe bidin herêmên dagirkirî ji Ezaz heta Efrînê û wan rizgar bikin."

Di dawiyê de şêniyan bi rêya alavên deng ev daxwaz ji hikumeta Şamê kirin:

- Divê Firqeya 4'an bendên xwe yên kontrolê ji derdora taxên Şêxmeqsûd û Eşrefiyê û kantona Şehbayê rakin.

-Bê şert ambargo bê rakirin û madeyên pêwîstiya gel pê heye û xeta sor in derbasî taxan bibe.

- Hatin û çûna welatiyan di navbera taxên  Şêxmeqsûd û Eşrefiyê û kantona Şehbayê asteng nekin.

Çalakî bi berzkirina diruşmeyan bi dawî bû.

(şt)

ANHA