Şêniyên herêma Efrînê siyasetên hikumeta Şamê şermezar kirin

Bi hezaran şêniyên herêma Efrînê li navçeya Ehdas li ser rêya di navbera kantona Şehbayê û bajarê Helebê de kom bûn û li dijî siyaseta hikumeta Şamê û dorpêçkirina gelê kantona Şehbayê û taxên Şêxmeqsûd û Eşrefiyê dest bi xwepêşandanê kirin.

Xwepêşandêran pankartên bi nivîsên “Em banga rakirina bendên kontrolê yên Firqeya 4`an û bidawîkirina dorpêçê dikin” rakirin.

Şêniyan kiryarên hikumetê şermezar kirin û gotin, divê hikumeta Şamê ji ber kiryarên xwe û dorpêçkirina gelê Sûriyê, ji xwe şerm bike.

Xwepêşandêr li benda kontrolê ya "ewlehiya dewletê" sekinîn. Leşkerên hikumeta Şamê yên li benda kontrolê çekên sivik rakiribûn. Li wir bi zimanê kurdî û erebî ji bo raya giştî daxuyaniyek hat dayîn. Li ser navên kantonên Şehba û Efrînê cîgirê hevserokatiya Meclisa Kantona Şehbayê Îsmaîl Mûsa û endama Meclisa Kantona Efrînê Leyla Heftaro daxuyanî xwendin.

Di daxuyaniyê de hate gotin: "Aloziya Sûriyê 11 sal li pey xwe hiştin, lê hîna jî rejîma Sûriyê di çareseriya leşkerî de israr dike û siyaseta ambargoyê berdewam dike. Bi wê yekê armanc dike sivîlan birçî bike.

Ji beriya 4 salan ve û heta roja îro hikumeta Şamê wê siyasetê li ser taxên Şêxmeqsûd û Eşrefiyê dimeşîne, ku zêdetirî 200 hezar sivîl li her du taxan dijîn. Her wiha li ser herêmên Şehbayê ku bi sed hezaran koşberên Efrînê û herêmên Şehbayê yên dagirkirî lê hene.

Em Meclisa Kantonên Efrîn û Şehbayê dorpêçkirina li ser taxên Şêxmeqsûd û Eşrefiyê û li ser herêmên Şehbayê şermezar dikin. Em bang li rêxistinên mafên microvan û saziyên kar û barên penaberan dikin ku zextê li hikumeta Şamê bikin, da ku ambargoyê rake. Her wiha em bang dikin ku berê xwe bidin herêmên Şehbayê da ku sûcên dewleta Tirk a dagirker li dijî koçberan belge bikin. "

Di dewama daxuyaniyê de hate gotin ku dê gelê li kantona Şehbayê ruxmî zor û zehmetiyan jî heta rizgarkirina Efrîn û herêmên Şehbayê yên dagikirî li ber xwe bide.

Di daxuyaniyê de bang li hikumeta Şamê hate kirin ku ambargoya li ser taxên Şêxemqsûd û Eşrefiyê û herêmên Şehbayê rake, çûn û hatin û veguhestina madeyên xwarinê, derman, sotemenî û ard ji bo taxên Şêxmqsûd û Eşrefiyê û Şehbayê were hêsan kirin, û bendên kontrolê yên Firqeya 4`an yên li ser hemû rêyên diçin Şêxmeqsûd, Eşrefiyê û Şehbayê werin rakirin.

Daxuyanî bi silavkirina berxwedana şêniyên Efrîn, Şehba, Şêxemqsûd û Eşrefiyê bi daw bû.

(eh)

ANHA