Cenazeyê şehîd Cîlo Efrîn bi merasîmeke girseyî hat veşartin

Bi hezaran şêniyên herêma Efrînê cenazeyê şervanê Hêzên Rizgariya Efrînê Celal Elî (Cîlo Efrîn) ê 13'ê Nîsanê dema erka xwe bi cih dianî, şehîd bû, bi merasîmekê li goristana Şehîdên Berxwedana Serdemê ya li navçeya Ehrisê ya kantona Şehbayê spartin axê.

Şêniyan cenazeyê şehîd ji pêşiya nexweşxaneya Avrîn a navçeya Fafînê wergirtin û bi karwanekî ji sedan erebeyan ber bi goristana Şehîdên Berxwedana Serdemê ve çûn.

Li goristanê merasîmek hate lidarxistin. Ji rêveberên Meclisa Malbatên Şehîdan Fewzî Mistefa axivî û sersaxî ji malbata şehîd re xwest.

Mistefa bal kişand ser fedekariyên şehîdan û got, bi rihê têkoşîn û wefedariya bi şehîdan re  ew ê Efrîn û hemû herêmên dagirkirî rizgar bikin.

Hevseroka Meclisa Kantona Efrînê Zelûx Bekir wiha axivî: "Bi saya fedekariyên şehîdan em bûne hêzeke xurt li ser vê xakê. Lê planên bi armanca lawazkirina me dewam in, li gel êrişên dagirkeriyê yên dewleta Tirk û çeteyên wl yên bi armanca valakirina herêmê, hikumeta Şamê ambargo li ser taxên Şêxmeqsûd û Eşrefiyê û kantona Şehbayê ferz kiriye û nahêle madeyên sereke derbas bibe."

Zelûx Bekir diyar kir ku ev siyaset ne nû ne, armanc jê koçberkirina şêniyan e û wiha domand: "Lê bi saya fedekariyên şehîdan em ji cîhanê re îsbat dikin ku em ê xeta berxwedanê dewam bikin heta ku Efrîn rizgar bikin û li warê xwe vegerin."

Zelûx Bekir bang li rêxistinên hiqûqî û mirovî kir ku erkên xwe li hemberî şêniyên herêma Efrîn û taxên Şêxmeqûsd û Eşrefiyê bi cih bînin û dawî li ambargoyê bînin.

Endama Komîteya Perwerdeya Civaka Demokratîk a Herêma Efrîn Şarvan Mihemed nasnameya şehîd xwend û radestî malbatê kir.

Cenazeyê şehdî bi diruşmeyan hat veşartin.

ANHA