Salvegera damezirandina Meclisa Leşkerî ya Minbicê hate pîrozkirin

Bi boneya salvegera 6'emîn a damezirandina Meclisa Leşkerî ya Minbicê, Akademiya Şehîd Koçerîn şahiyek li dar xist. Di şahiyê de dewreyeke din a şervanên meclisê qediya.

Şervan û fermandarên Meclisa Leşkerî ya Minbicê, nûnerên saziyên Rêveberiya Sivîl a Demokratîk a Minbic û gundewarê wê, nûnerên partiyên siyasî û saziyên civaka sivîl beşdarî şahiyê bûn.

Şahî bi toraneke leşkerî ji aliyê şervanên Meclisa Leşkerî ya Minbicê û Hêzên Ewlekariya Hundirîn ve dest pê kir.

Paşê Fermandarê Giştî yê Meclisa Leşkerî ya Minbicê Mihemed Mistefa (Ebû Adil) axivî, îşaret bi girîngiya avakirina meclisan, bûyerên ku beriya avakirina meclisê û piştî wê rû da kir û got: "Ev roj li ber dilê me hêja ye."

Her wiha Hevserokê Meclisa Qanûnsaz a Rêveberiya Sivîl a Demokratîk a Minbicê Mihemed Elî El-Ebo jî salvegera 6`emîn a damezirandina Meclisa Leşkerî ya Minbicê pîroz kir û got ew hêz, îrade û berxwedana xwe ji berhemên berxwedana şervanên meclisê digrin.

El-Ebo wiha domand: "Damezirandina Meclisa Leşkerî ya Minbicê, bîranîneke ne jê rêzê ye ku em bi bîr tînin, lê belê ji bo vejandina rihê Minbic û gundewarê wê ye."

Piştre Rêveberiya Sivîl a Demokratîk a Minbic û gundewarên wê, plaket diyarî Ceyş El-Siwar (Artêşa Şoreşgeran),  Nivîsgeha Parastinê, Meclisa Leşkerî ya Minbiê kir.

Paşê merasîmê derçûna 40 şervanan li dar ket.

Merasîm bi deqeya rêzgirtin û torana leşkerî ya şervanên derçûyî dest pê kir.

Dewreya perwerdeyê bi navê Şehîd Cafer Hec Elî bû. Di dewreya perwerdeyê 3 mehan dewam kir de 40 şervan ji hêzên Komandos tev lê bibûn û waneyên fikrî, leşkerî û siyasî dîtin. Merasîm bi gerandina govendan bi dawî bû.

 (bx)

ANHA