Li Helebê şehîd Bekir Bekir hate oxirkirin

Di merasîmê de bi sedan şêniyên taxên Şêxmeqsûd û Eşrefiyê, endamên saziyên sivîl, Hêzên Ewlekariya Hundirîn, meclis, komîn û HPC beşdar bûn.

Karwana şehîd ji pêş nexweşxaneya Xalid Fecir a li beşa rojava ya taxa Şêxmeqsûdê di nava tilîliyên dayikan û diruşmên silavkirina şehîdan de dest pê kir.

Karwana şehîd li tevahî kolanên beşa rojava ya taxa Şêxmeqsûdê geriyan û piştre berê xwe da ber Goristana Şehîdên Berxwedana Taxên Şêxmeqsûd û Eşrefiyê ya li herêma Şiqeyêf a Helebê.

Li goristanê, endamên HPC û Hêzên Ewlekariya Hundirîn toraneke leşkerî li dar xist, dûvre endamê Meclisa Malbatên Şehîdan Remzî Bekir axivî û wiha got: "Şehîd Bekir parastina taxa Şêxmeqsûd kir, bi şev û roj parastina gelê xwe kir heta gihaşt asta şehadetê."

Li aliyekî din jî endamê rêveber ê HPC’ê ya Şehba û Helebê Arif Menan wiha got: "Şehîd tiştên herî pîroz in, ne ji têkoşîn û fedekariyên wan bûya em nedigihaştin vê qonaxê. Bi saya şehîdan gelên herêmê ji Kurd, Ereb û Suryan bûn yek û li hember dagirkeriya Tirk û çeteyên wê li ber xwe da."

Menan wiha domand: "Di êrişên li ser taxa Şêxmeqsûdê de, hemû pêkhate û etnîk li ser bingeha şer gel ê şoreşgerî bûne yek û welatî tev li HPC’ê bûn ku li gel şervanên li eniyên şer parastina taxa xwe bikin."

Dûvre wesîqeya şehadetê hate xwendin û radestî malbatê hate kirin û şehîd di nava tilîliyên dayikan de hate oxirkirin.

(fr)

ANHA