Piştî 34 salan ji komkujiya Helebçe xeteriya çekên kîmyewî li ser gelê Kurd didome

Têkildarî mijarê PYD`ê şaxê Minbicê daxuyaniyek da. Daxuyanî ji aliyê Hevseroka PYD`ê şaxê Minbicê Rîm Derwîş ve hate xwendin. Tê de şêniyên bajar, endamên PYD`ê beşdarî bûn. Daxuyanî li hola El-Samir hate dayîn.

Di daxuyaniyê de salvegera 34`an a komkujiya Helebçe ku di 16`ê Adara 1988`an ji aliyê rejîma şovenîst a Iraqê ve li dijî şêniyên bajarê Helebçeyê hate kirin, hate şermezarkirin. 

Her wiha hate diyarkirin ku zêdetirî 5 hezar welatî şehîd bûn, nêzî 10 hezar kes jî birîndar bûn ku piraniya wan zarok û jin bûn, ev jî di nava bêdengiya çapemeniya cîhanê de hate kirin û rejîmê sûd ji vê yekê girt ku  doza Kurd bê deng bike, bîrewariya Kurd biçewisîne û gelê radest bike.

HERÊMA  EFRÎN

Girêdayî mijarê de şêniyên herêma Efrîn û xwendekarên Peymangeha Şehîd Viyan Amara bi daxuyaniyekê şehîdên komkujiya Helebçe bi bîr anîn, bêdengiya navneteweyî derbarê êrişên li ser Kurdan de şermezar kir. Daxuyanî ji aliyê Siyabend Faqîn, Sêrvîn Mihemed û Cemîle Nebo ve hate xwendin.

Di daxuyaniyê de hate gotin, meha Adarê meha serkeftinê ye, tê de gelê Kurd bêhna azadiyê kir, ji ber ew gelekî berxwedêr û xwediyê dîrokekê ye, ji ber vê yekê jî dewletên dagirker dixwazin vê dîrokê parçe bikin û bi rêbazên cûda komkujiyan li dijî Kurdan pêk bînin.

Her wiha hate destnîşankirin ku rejîma Baas a şovenîst xwest hebûna Kurdan tune bike, komkujî li dijî wan pêk anîn û ev yek li beramberî çavê cîhanê hate kirin. Di daxuyaniyê de hate piştrastkirin ku êrişên ku îro li dijî Kurd û rêber APO têne kirin ji wan êrişan ne cûdatir e û ew jî berdewamiya wê ye.

QAMIŞLO

Tevgera Xwendekarên Demokratîk jî bi vê boneyê pêşbirkeke helbestan li dar xist. 22 kes beşdarî pêşbirkê bûn. Pêşbirk li navenda Mihemed Şêxo ya Çand û Huner a bajarê Qamişlo hate lidarxistin.

Xwendekarên dibistana Îbrahîm Henano, Um El-Fursan, Seyda Zeyneb û Lehdo Mesûd tev li pêşbirkê bûn.

Di pêşbirkê de endamê Tevgera Ciwanên Şoreşger a Sûriyê Nîşan Herekol axivî, îşaret bi girîngiya girêdana bi desteftiyên şoreşê ku bi saya berxwedan û berdêla gelan hatine bidestxistin, kir.

Her wiha Nîşan Herekol teqez kir ku komkujiya Helebçe nayê jibîrkirin ku di encama wê de 5 hezar Kurd di navd e zarok û jin şehîd bûn.

Di dawiyê de tevgera ciwanan pirtûk li kesên tev li pêşbirkê bûne û li beşdaran belav kir.

(bx)

ANHA