​​​​​​​Rêveberên saziyên çandî: Ji bo tunekirina çanda me PKK`ê xistin "lîsteya terorê"

Bangên ji bo rakirina qedexeya li ser Partiya Karkerên Kurdistanê (PKK) roj bi roj bi zêde dibin. Endamên rêveber ên saziyên çandê yên herêma Firatê ji ANHA'yê re axivîn û diyar kir ku bi xistina PKK'ê nav "lîsteya terorê", dixwazin çanda kurdan qir bikin.

‘EM ŞOPDARÊN RÊYA TÊKOŞERÊN PKK`Ê NE‘

Ji rêveberên Komîteya Çand û Hunerê ya Meclisa Kobanê Omer Hesen got, armanca xistina PKK`ê nava "lîsteya terorê" herêmê bixin bin serweriya xwe û wiha domand: "Ji ber ku PKK`ê ji projeyên şovenîst yên dixwazin jinûve herêmê parçe bikin re dibe bersiv. Her wiha ji bo çandên nû derbasî herêmê bikin û bi vê yekê şêniyên herêmê urf, adet û çandên xwe yên li ser hevgirtinê hatine avakirin, ji bîr bikin."

Omer Hesen piştgiriya xwe bi PKK'ê re nîşan da û got: "Em ji tiştekî natirsin. Em ê bi hemû hêza xwe bi PKK`ê re bisekinin. Ji ber ku PKK'ê hebûna me ye. Gerîlayên wê ji bo me canê xwe feda kir. Kî ji me dikare şehîd Mezlûm Dogan ê êvara Cejna Newrozê agir bi canê xwe xist, ji bîr bike. Şehîd Mezlûm xwest bi vê yekê peyamekê bide cîhanê ku Kurd jinûve jidayik dibin û dijmin çi bike jî nikare îradeya me bişkîne."

Omer Hesen peyamek da komplogerên li dijî Kurdan û wiha dawî li axaftina xwe anî: "Em şopdarên rêya têkoşerên partiyê û şehîdên wê ne. Em ê xewna wan ku ji bo têkoşiyan, pêk bînin. Heta ku navê PKK`ê ji "lîsteya terorê" were derxistin em ê têbikoşin."

'HEWL DIDIN DÎROK Û ÇANDA KURDAN REŞ BIKIN'

Ji rêveberên Tevgera Hîlala Zêrîn a herêma Firatê Gulçîn Hiso Elî da zanîn ku dewletên ku xaka Kurdistanê parçe kir, dixwazin dîrok û çanda Kurdan reş bikin û çi ji destê wan tê dikin da ku planên xwe pêk bînin. Gulçîn Hiso wiha got: "Planên wan bi ser neketin, ji ber ku Kurdan dîroka xwe bi can û xwîna şehîdan nivîsandine."

Gulçîn Hiso îşaret pê kir ku PKK'ê ji bo parastina kurdan û doza wan hatiye damezirandin û pêde çû: "Dijminê me hove dixwaze çanda me ya zengîn ku li ser lêborînê hatiya avakirin, reş bikin û tune bike. Bi xistina navê PKK`ê di nava "lîsteya terorê" de hewl dide armancên xwe pêk bîne. Ji ber ew dizanin ku PKK`ê ji bo parastina Kurd û doza wan hatiye damezirandin."

Gulçîn Hiso her wiha destnîşan kir ku armanc ji xistin navê PKK`ê ji "lîsteya terorê" re hedefgirtina Kurdan bû û got: "Piştî têkbirina çeteyên DAIŞ`ê, kurdan careke din ji cîhanê re îsbat kir ku ew gelekî aştîxwaz e, ji bo gelên din canê xwe feda dike û di çi rewşê de serî ji kesî re natewîne."

Gulçîn Hiso di dawiyê de pirsa ''Di bin kîjan bendî de navê PKK`ê xistine "lîsteya terorê", gelo ji ber parastina gel û xaka wê dike û dest ji pîvanên xwe bernade?" kir.

(bx)

ANHA