ꞌVîna gelan hemû planên hikumeta Şamê vala derxistinꞌ

Bi beşdarbûna girseyeke mezin a şêniyên herêma Cizîrê û Dêrazorê merasîmê bîranîna salvegera 18'emîn a Serhildana 12'ê Adarê ya Qamişlo, bi diruşma "Bi rihê berxwedana Pêngava Gurzê Gelan em salvegera 18'emîn a Serhildaan 12'ê Adarê bi bîr tînin" li Stada Şehîdên 12'ê tê lidarxistin.

Merasîm bi sirûda kurdî Ey Reqîb dest pê kir, piştre hevserokê Meclisa Rêveber a Rêveberiya Xweser a Herêma Cizîrê Telat Yunis axivî û hemû şehîdên azadiyê bi bîr anîn.

Telat Yunis ev li gotina xwe zêde kir: "Rejîma Baasê ya desthilat a şovînîst hewl da fitneyê di navbera pêkhateyan de derxîne, her wiha komkujiyên mezin li dijî gelê me pêk bînin, lê gelê herêmê bi têkoşîna xwe hemû plan têk birin."

Telat Yunis anî ziman ku bi rihê Serhildana 12`ê Adarê Şoşreşa 19`ê Tîrmehê dest pê kir û got: "Bi rihê berxwedana azad me karî hemû siyaset û planên dijmin vala derxist û bi hev re rêveberiya xwe ya xweser ava kir. Rihê Serhildana 12`ê Adarê di hemû qonaxên Şoreşa 19`ê Tîrmehê de hate diyarkirin, ji pêngava Serêkaniyê bigire û heta bi Kobanê, Hesekê û Efrîn. Hêzên dijbertiya projeya Rêveberiya Xweser dikin, hewl da vîna gelan bişkînin û projeya wan a demokratîk têk bibin, her wiha di êrişên li dijî girtîgeha Sînaa ya taxa Xiwêranê jî hewl da careke din fitneyan derxin, lê bi rihê Şoreşa 19`ê Tîrmehê hemû plan têkçûn û qadên şer veguherîn qadên berxwedanê."

ꞌVÎNA GEL BI SER KETꞌ

Telat Yunis diyar kir ku gelê Bakur û Rojhilatê Sûriyê û hêzên xwe yên leşkerî ji bo azadiya xwe û parastina destkeftiyên şoreşê, her wiha ji bo avakirina Sûriyeke demokratîk tê koşiyan û hîn jî li ber xwe didin.

Yunis di berdewamiya gotina xwe de li dijî hemû planên li ser gelê herêmê û siyasetên dewleta Tirk dide meşandin, banga xurtkirina hevgirtinê kir û wiha domand: "Hikumeta Şamê hîn jî heman siyasetê şovînîst dide meşandin û dibe sedema dirêjkirina temenê aloziya Sûriyê, lê gelê sûrî nema vê siyasta desthilatdar qebûl dike û projeya Rêveberiya Xweser ji bo çareseriya aloziya Sûriyê baştirîn çareserî dibe.  "

Telat Yunis anî ziman ku Rêveberiya Xweser a Bakur û Rojhilatê Sûriyê ji bo çareserkirina aloziya Sûriyê, ji lidarxistina diyalogan re amade ye.

Endama Meclisa Malbatên Şehîdan a Herêma Cizîrê Cewahir Osman jî axivî û got: "Serhildana 12`ê Adarê tîrêja berxwedana gelan a ku hemû siyasetên şovînî têk birin. Hikumeta Şamê her hewl dide şerê navxweyî di navber Kurd û Ereban de derxe, lê armancên wê bigihîne serî."

Cewahir Osman anî ziman ku rejîma Samê li dijî Kurdan hemû siyasetên înkarkirinê pêk anî, da ku vîna wan bişkîne û wan qir bike, lê gel bi ser ket û hevgirtina îro isbata binketina van siyasetan e.

Merasîma salvegera 12`ê Adarê bi çalakiyên werzîşê dewam dike.

(eh)

ANHA