‘Keziyên Kesk’ li Hesekê dest bi çandina 6 hezar daran kir

Tîma "Keziyên Kesk" li Hesekê dest bi xebatên xwe yên avakirina baxçeyên daran kir. Li gorî rêvebereke tîmê, xebatên çandina daran dê hefteyekê bidomin.

CIVAK Û JIYAN

10 adar, 2022 11:46

HESEKÊ

Hemleya "Keziyên Kesk" ku beriya salekê li Qamişloyê dest pê kiribû, xebatên xwe yên çandina 4 milyon daran li seranserê bajarên Bakur û Rojhilatê Sûriyê didomîne.

Tîma Keziyên Kesk di çarçoveya berfirehkirina xebatên xwe de îro dest bi hemleya çandina tovên darên daristan û şitilan li bajarê Hesekê kir û dê hefteyekê bidome.

Xwendekar û endamên Desteya Perwerdeyê ya Hesekê jî beşdarî hemleyê bûn û şitil û tovan li baxçeyê li taxa Mişeref ê Hesekê diçînin.

Li ser projeya çandina daran ji rêveberên tîma xebatê Şêrîn Îbrahîm got: "Projeya Keziyên Kesk li Hesekê di 5'ê Îlona 2021'an de li zeviyekê dest pê kir."

Şêrîn Îbrahîm wiha axaftina xwe dom kir: "Piştre xebat li ser komkirina tovên ji xwezayê hate kirin û di destpêka biharê de xebatên çandina tov û daran didomin û dê heta 17'ê Adarê berdewam bike. Zêdetirî 6 hezar şitil dê werin çandin. Xwendekar, mamoste, rêveber, endamên Yekitiya Rewşenbîran, meclis, komîn û hemû beşên civakê tê de beşdar in."

(dx)

ANHA