Yekitiya Jinên Ciwan û Kongra Star çalakî li dar xistin

Endamên Yekitiya Jinên Ciwan a bajarê Hesekê bi boneya 8'ê Adarê Roja Jinan a Cîhanê şanoyek pêşkêş kir. Şano îro li kampa Serêkaniyê hat nîşandan.

Endama Yekitiya Jinên Ciwan Leyla Hisên diyar kir ku şanoya bi navê "Viyan û Nûjiyan" li ser navê her du endamên Yekitiya Jinên Ciwan ku di 25'ê Kanûna sala borî de tevî 4 endamên Tevgera Ciwanên Şoreşger di êrişeke dewleta Tirk a dagirker de li Kobanê şehîd bûne û diyar kir ku ev şano diyarî her du şehîdan kirine.

Di çarçoveya çalakiyên Roja Jinan a Cîhanê de Kongra Star a kampa Serêkaniyê ya kantona Hesekê daxuyaniyek da raya giştî.

Daxuyanî li pêşiya navenda Hêzên Parastina Civakî ya kampa Serêkaniyê ji aliyê rêvebereke Kongra Star a kampê Cîhan Mihemed ve bi amadebûna bi dehan jin û mêr û endamên saziyên sivîl û leşkerî, hate xwendin.

Di daxuyaniyê de wiha hate gotin: "Di dîrokê de reftarên rast û çewt ên mirovan hatin nivîsîn, di 8'ê Adarê de jinan di warê siyasî, civakî, aborî û leşkerî de li dijî her cure koletî û mêtingeriyê dîrok nivîsand.

8'ê Adarê rastiya jina azad îfade dike, ji ber ku tu civak bê zext û zordariya li ser jinê û kolekirina ruh û bedena wê bi hemû rêbazên mêtingerî û dagirkeriyê nayên çewisandin, ji ber vê yekê azadiya jin, civak û gel hev du temam dikin."

Di daxuyaniyê de li ser sûcên li dijî jinên êzidî û êrişên li ser Rojava hate destnîşankirin ku armanca wan şikandina vîna jinan û sînordarkirina rola wan e. Her wiha hate piştrastkirin ku berxwedana jinên Bakur û Rojhilatê Sûriyê hemû planên dewleta Tirk pûç kirine.                      

Di daxuyaniyê de bang li hemû jinan hat kirin ku li hemberî hemû siyasetên li dijî wan serî hildin û ji bo rakirina tecrîda li ser rêber Abdullah Ocalan û bidestxistina azadiya fîzîkî dakevin qadan û asta têkoşînê bilind bikin heta rizgarkirina hemû herêmên dagirkirî, têkbirina dagirkeriyê û vegerandina mafên jinên bindest.

(dx)

ANHA

<iframe width="560" height="316" src="https://www.youtube.com/embed/SJYHMm-qOio" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>