Salvegera rizgarkirina Til Hemîsê hate pîrozkirin

YPJ û YPG`ê di 27`ê Sibata 2015`an de navçeya Til Hemîsê ji çeteyên DAIŞ`ê rizgar kir. Bi vê boneyê şahiyek hate lidarxistin. Şêniyên navçeyê, nûnerên partiyên siyasî, rûspiyên eşîran, nûnerên saziyên Rêveberiya Xweser a Herêma Cizîrê beşdarî şahiyê bûn.

Di şahiyê de bi navê Meclisa Navçeya Til Hemîsê Salih El-Xelef axivî, îşaret bi rola şehîdan di rizgarkirina navçeyê de kir û wiha anî ziman: "Ji bo rizgarkirina navçeya me ji çeteyên DAIŞ`ê şervanan canê xwe feda kir. Xwîna pêkhateyên herêmê ji Kurd, Ereb û Suryan tev li hev bû. Ev jî nîşaneya hevgirtina hemû pêkhateyan e."

Paşê bi navê Kongra Star a navçeyê Ezar El-Fîhan, Hevserokê Desteya Hundirîn a Herêma Cizîrê Kenan Berekat û Hevseroka Meclisa Navçeya Tirbesiyê Hediye Şemo axaftin hatin kirin. Di axaftinan de rizgarkirina herêmê li hemû şêniyan hate pîrozkirin û îşaret bi rola şehîdan di rizgarkirina bajar de hate kirin. Her wiha hate gotin, bi saya hêzên leşkerî tarîbûn ji ser bajar hate rakirin û gel bi aştî û ewlehî dijî.

Her wiha komên şano yên girêdayî navenda çand û huner a navçeya Til Hemîs şano pêşkêş kir û şahî bi govendê bidawî bû.

(bx)

ANHA