Peymangeha Amadekirina Mamosteyan li Qamişloyê hate vekirin

Ji bo xwendekarên nekarîn tev li zanîngehê bibin, xwe lê tomar bikin û hejmara mamosteyên pispor ên asta navîn zêde bike, Desteya Perwerde û Fêrkirinê ya Herêma Cizîrê bi dirûşma "Bê zanist kesek pêş nakeve, êş û azar zêde dibin, Desteya Perwerde û Fêrkirinê" li kantona Qamişloyê Peymangeha Amadekirina Mamosteyan bi merasîmekê vekir. Nûnerên Desteya Perwerde û Fêrkirinê ya herêma Cizîrê, Desteya Çand û Hunerê ya Herêma Cizîrê, Kongra Civaka Îslama Demokratîk, mamoste, endamên rêveber ên Zanîngeha Rojava, Meclisa Malbatên Şehîdan, bi dehan endamên saziyên sivîl û xwendekarên peymangehê tev li merasîma vekirinê bûn. 

Di merasîmê de endama rêveber a peymangehê Şîlan Mihemed axivî û vekirina peymangehê li gelên herêmê pîroz kir.

Şîlan Mihemed destnîşan kir ku vekirina peymangehê di Roja Zimanê Dayîkê ya Cîhanê de gaveke erênî ye û derfetê ji xwendekaran re vedike ku di amadehî de bi ser ketin lê nikarîn di zanîngehên Bakur û Rojhilatê Sûriyê de tomar bikin.

Hevserokê Desteya Perwerde û Fêrkirinê ya Herêma Cizîrê Mihemed Salih Ebdo axivî û bixêrhatina beşdaran kir û got: "Bi saya şehîdan Rêveberiya Xweser ewqas destekftî bi dest xistin. Bi vê boneyê em spasiya Meclisa Rêveber a Rêveberiya Xweser dikin ku roleke girîng di vekirina peymangehê de lîst. "

Di Peymangeha Amadekarina Mamosteyan de 376 xwendekar hene. 50 mamosteyên beşên cuda waneyan di peymangehê de didin.

(şx)

ANHA