Dema serlêdana xwendina serbest hate dirêjkirin

Di 17`ê Mijdara 2021`an de Desteya Perwerde û Fêrkirinê ya Bakur û Rojhilatê Sûriyê bi biryarnameyekê pergala xwendina serbest (hur) ragihand. Di 15`ê Çileyê de jî ezmûnek çêkir. Pergala xwendina serbest ji bo refên 9 û 12`an e.

Der barê mijarê de endamê Rêveberiya Navenda Ezmûnan a Herêma Cizîrê Nûredîn Mihemed diyar kir ku ezmûna ku ji xwendekaran re hat çêkirin, li ser esasê tecrubeyekê bû da ku xwendekar bêhtir sîstema Desteya Perwerde û Fêrkirinê nas bikin.

Li gorî Nûredîn Mihemed got ji bo refa 9`an 45 xwendekaran û ji bo refa 12`an jî 396 xwendekaran navê xwe tomar kiriye.

Li ser dirêjkirina dema tomarkirina navan, Nûredîn Mihemed got: “Diviyabû tomarkirin 6`ê Çileyê bihata rawestandin, lê ji ber pirbûna daxwazan me heta dawiya Nîsana 2022`yan dirêj kir.”

BERNAME

Bernameya ezmûnan a refa 9`an ji di 1-19`ê Hezîranê de, ji bo refa 12`an beşa wêjeyê di 1-16`ê Hezîranê de û di beşa zanistî de jî di 1-19`ê Hezîranê de dewam dike.

Mihemed da zanîn ku dê di dawiya meha Nîsanê navendên ezmûnan werin diyarkirin. Têkildarî perwerdeya derveyî dibistanê jî Nûredîn Mihemed got: “Perwerde ji xwendekarên refên 9 û 12`an re bê pere ye, xwendekarên xwendina serbest jî dikarin tev li wan perwerdeyan bibin.”

Li gorî biryarnameyê ji bo xwendina serbest kesên ku navê xwe ji bo refa 9`an tomar bike, divê 14 salên xwe temam kiribe, ji bo refa 12`an jî divê 17 salên xwe temam kiribe. Her wiha di her du refan de heke xwendekar di ezmûna dawiyê de bi ser ket, ji mafê wan e ku careke din ezmûnê dubare bikin, lê heke bi ser neket ji mafê wan e 2 caran dubare bikin.

ANHA