Komîteya Lihevanînê li Hesekê du bira li hev anî

Rûspiyên eşîrên Kurd û Ereb ên bajarê Hesekê û navçeya Amûdê, bi hevkariya Komîteya Lihevanînê ya Rêveberiya Xweser a Herêma Cizîrê li Hesekê du bira ji eşîra Gabara, li hev anîn.  Nakokiya di navbera her du birayan de 12 salan dewam kir.

Her du bira Mehmûd Hisên û Hemîd Hisên ji gundê Bêzara yê Hesekê ne, ji sala 2009‘an de bi hev ketibûn û di encamê de zarokekî Mehmûd Hisên li ser destên kurapê xwe Hemîd Hisên,  hate kuştin.

Şêniyên eşîra Gabara li taxa Kelasê ya li naverasta Hesekê, komeke kon vegirtin û xwarin ji kesên tev li lihevanînê bûn re, amade kirin.

Rûspiyên eşîra Gabara, bi dehan rûspiyên eşîrên Kurd û Ereb ên kantona Hesekê, Meclisa Kantona Hesekê, rayedarên Rêveberiya Xwser a Herêma Cizîrê, Meclisa Aştiya Navxweyî û bi dehan şêniyên Amûdê û Hesekê tev li merasîma lihevanînê bûn.

Merasîma lihevanînê bi gotina şêwirmenda Rêveberiya Xweser a Kantona Hesekê Zeyneb Şêtka destpê kir. Zeyneb Şêtka lihevanîna her du birayan pîroz kir û spasya kesên tev li vê gavê bûne, kir.

Zeyneb Şêtka anî ziman ku ji her kesî tê xwestin li hev biborînin û ji hev hez bikin, çi Kurd çi Ereb û pêkhateyên din bin. Her wiha li ser bingeha rêgezên neteweya demokratîk û biratiya gelan bijîn.

Serokê Meclisa Êla Cibûr a Herêma Cizîrê Fewaz Zobe axivî û got: "Ev kon ji bo çareserkirina pirsgirêkên Bakur û Rojhilatê Sûriyê hatiye vegirtin, bi wê re em desteka gelên xwe ji aştî û lihevanînê re pîroz dikin, ji ber ku isbata hevgirtina li herêma Cizîrê û di navbera pêkhateyên herêmê de dike."

Hisên Şihadê jî beşdarî merasîma lihevanînê bûbû axivî û got: "Em spasiya rûspiyên eşîra Gabara dikin ku tev li vê lihevanîna pîroz bûn û dawî li nakokiya her du birayan anîn. Li ser vê yekê em bang li pêkhateyên herêmê dikin ku ji hev hez bikin."

Di dawiya merasîmê de xwarin hate danîn û her du bira silav dan hev.

(eh)

ANHA