Cemal Hesen bû serokê Komeleya Newroz a Çandî û Civakî

Komeleya Newroz a Çandî û Civakî ya li Lubnanê civîna xwe ya salane li dar xist.

Civîn ji aliyê sekretêra komeleyê Nesrîn Biro ve hate birêvebirin. Seroka Komeleya Newroz a berê Henan Osman axivî. Henan Osman spasiya beşdaran û her du desteyên birêveber û giştî kir ku bi erka xwe rabûne.

Henan Osman ev li gotina xwe zêde kir: "Komeleyê ji destpêka avakirinê ve di 2014`an de, bi armanca xizmeta gelê Kurd ên li Lubnanê li hemberî gelek zehmetî û astengiyan sekinî."

Henan Osman bal kişand ser xebatên komeleyê di dirêjahiya 8 salên derbasbûyî de û got: "Komeleya Newroz a Çandî û Civakî bûbû navenda naskirin û lidarxistina diyalogan, di heman demê de pira di navbera çandên cuda yên li Lubnanê de bû, ji wan Kurd, Ereb, Ermen û Suryan."

Serokê nû yê komeleyê Cemal Hesen piştî hate erkdarkirin axivî û li ser kar û xebata hatine kirin, spasiya Henan Osman kir.

Endamên komeleyê, dostên komeleyê û seroka Weqfeya Jîn a Jinan Bûşra Elî jî tev li civînê bûn. Bûşra Elî spasiya seroka berê Henan Osman û serokê nû kir û hêviya serkeftinê ji wan re xwest.

Beşdaran hilbijartina serokê nû pîroz kir û hêviya serkeftinê kirin.

(eh)