Li dijî planên li ser herêmê banga hevgirtinê kir

Şêx û rûspiyên eşîrên Tebqa û şêniyên Til Temir bi du daxuyaniyên cuda, êrişên çeteyên DAIŞ`ê yên li dijî girtîgeha Sînaa ya taxa Xiwêran a Hesekê şermezar kirin.

Daxuyaniya eşîrên Tebqayê, ji aliyê şêxê eşîra Sebxa, Fewaz Bêg ve hate xwendin.

Di daxuyaniyê de bal hate kişandin li ser bûyerên li girtîgeha Xiwêran a Hesekê rû dan ku bi hezaran çeteyên DAIŞ'ê lê hene û wiha gotin: "Di pêngavên dawî yên QSD'ê de yên bi armanca rizgarkirina xakê û gelan ji vê rêxistina terorîst, ev çete li gorî qanûn û sîstemên navneteweyî û mafên mirovan hatin girtin. QSD'ê wekî dîlên şer nêzî van girtiyan dibin. Gelek caran Rêveberiya Xweser bang li welatan kir ku welatiyên we girtî werbigirin, lê ev banga mirovî û exlaqî bê bersiv hate hiştin û tu çareserî ji wan girtiyan re nedîtin."

Di daxuyaniyê de bang li eşîr û qebîleyan hate kirin ku li hemberî êrişên li ser Bakur û Rojhilatê Sûriyê, êrişên li dijî rêveberî û hêzên leşkerî hevgirtina xwe xurt bikin û hate gotin: "Ev hêz û rêveberî ji bo xizmet û parastina gel hatine avakirin."

Şêx û rûspiyên di dewama daxuyaniya xwe de bal kişandin ser "Lihevkirin" ku hikumeta Şamê behsa wê dike û gotin: "Ev lihevkirin ne rewa û ne niştimanî ne."

Di rûspiyan dawiyê de bang li civata navneteweyî kir ku Rêveberiya Xweser nas bike, her wiha ewlehiyê misoger bike û DAIŞ`iyan têk bibe.

Bi mijarê ve girêdayî şêniyên navçeya Til Temir daxuyaniyek da. Endamê Nivîsgeha Kar û Barên Rêxistinan a  Navçeya Til Temir, Xelîl Xelo daxuyanî xwend.

Di daxuyaniyê de ev hate destnîşankirin: "Komplo mezin bû û armanc jê ne rizgarkirina terorîstan bû, lê belê derbekirina Rêveberiya Xweser û alozkirina herêmê bû, her wiha da ku derfetê ji dagirkeriya Tirk û hikumetê re çêke ku bi hinceta şerê li dijî terorê, destwerdana herêmê bikin.

Em êrişên DAIŞ`ê yên li dijî Hesekê şermezar dikin û li ser helwesta hikumetê ku bi rewşa Hesekê re berê rastiyan hate guhartin, mat dimînin ji ber ku diviyabû hikumetê sûrî kom bikira û ji bo çareserkirina aloziya Sûriyê, diyalogeke sûrî li dar bixista.

Di şerê li dijî çeteyên DAIŞ`ê de dê gelê navçeyê piştevanên QSD`ê, Hêzên Ewlekariya Hundirîn û gelê bajarê Hesekê bin, her wiha piştgiriya xwe ya ji Rêveberiya Xweser û projeya wê re ku ji bo Sûriya pêşerojê modela herî guncaw e, tînin ziman.

Di dawiyê de bang li hêzên Koalîsyona Navneteweyî, civata navneteweyî û NY`yê dikin ku Rêveberiya Xweser nas bike. Ji bo parastina herêmê û dîtina çareseriyekê ji dosyaya çeteyên DAIŞ'ê desteka leşkerî û siyasî pêşkêş bikin."

(eh)

ANHA