Topbarana dewleta Tirk binesaziya gundê Fatse yê Eyn Îsayê wêran kir

Dewleta Tirk a dagirker bi dijwarî jîngehan topbaran dike. Di wan êrişan de çekên giran, moşek û dron bi kar tîne. Her wiha yekser stasyonên avê û torên kehrebeyê yên wan gundan kirin hedef û qanûnên navneteweyî yên têkildar binpê kirin.

Gundê Fatse yê nêzî depoyên Şergirak û li başûrê rêya M4 hema bêje rojane tê topbarankirin. Tê de derdora 200 malbat hene di nav de koçberên ji herêmên din û şêniyên resen.

Kameraya ajansa me piştî şeveke dirêj a topbaranê, nêrînên gundiyan têkildarî topbaranê girt. Welatiya bi navê Şaha Elî got: “Ji ber topbaranê em nikarin xew bikin. Kêliya topbaranê me neçar dibin ji mal derkevin çolê û zarokên me ji sermayê nexweş dibin.”

Şaha ev pirs kir: “Gelo me çi kiriye, heta kengî topbaran dê berdewam bike û Erdogan çi ji me dixwaze?”

Şaha wiha berdewam kir: “Pirî caran bi şev û hin caran bi sibê gund topbaran dikin. Ji ber wê zirar gihaşt torên avê û kehrebeyê û av, kehrebe qut bû.”

Şaha Elî piştrast kir ku rewşa wan trajedîk e û bang li aliyên têkildar kir ku rê li pêşiya dewleta Tirk bigirin. Ew tenê dixwazin li mala xwe di nava ewlehiyê de bin.

Beriya 2 rojan dewleta Tirk a dagirker stasyona ava vexwarinê ya Hîşe ku li rojhilatê navçeya Eyn Îsayê ye, bû armanca topên dewleta Tirk a dagirker. Ji ber wê stasyon rawestî. Lê piştre werşeyên fenî yên têkildar, stasyon sererast kir û dîsa dest bi xebatê kir.

Li aliyekî din rûspiyê gundê Fatse Nasir El-Hemîdî got: “Dewleta Tirk ji bakurê rêya navneteweyî gundê me topbaran dikin. Ji hemû aliyan top û moşek li ser gund û gundên derdorê dikevin. Malên me yekser tên hedefgirtin.”

El-Hemîdî wiha pê de çû: “Dewleta Tirk a dagirker di topbarana xwe de moşekan bi kar tîne û di rojekê de derdora 50 moşek li gund ketine.”

Girêdayî saetên topbaranê Nasir El-Hemîdî got: “Dema roj diçe ava, topbaran dest pê dike û heta derengiya şevê didome. Dema moşek li gund dikevin, her tişt li dor me hildiweşe.”

Droneke dewleta Tirk a dagirker di 12`ê Çileyê de malek li gundê Fatseyê topbaran kir ku di encamê de zirarên madî çêbûn. Her wiha gundên rojhilatê gundewarên Eyn Îsa û rojavayê gundewarên Girê Spî bi çekên giran hatin topbarankirin.

(şx)

ANHA