Şêniyên Hesekê Ii dijî girtina deriyên sînor daketin qadan

Bi sedan şêniyên navçeyên kantona Hesekê; Dirbêspyê, Til Temir û Zirganê meşiyan û girtina deriyên sînor ji aliyê Partiya Demokrat a Kurdistanê (PDK) ve şermezar kir.

Şênî li pêşiya navenda Tevgera Ciwanên Şoreşger a Sûriyê ya navçeya Dirbêsiyê kom bûn û heta Qada Şehîdan meşiyan.

Li qadê meş rawestî  û veguherî mitîngê. Di mitîngê de, hevserokê Meclisa Navçeya Dirbêsiyê Rustem Bekir axivî û got: “Ji zêdetirî sê mehan ve, em ji bo wergirtina cenazeyên şehîdên xwe çalakiyan li dar dixin. Li şûna ku piştgiriyê bide çalakiyên me, PDK`ê deriyên sînor girtin û embargo li herêmê ferz kir.”

Bekir diyar kir ku ew ji vê meşê armanc dikin, embargoya PDK`ê ya li ser herêmê şermezar bikin û wiha domand: “Ev kiryar li gorî dewleta Tirk a dagirker e ku rojane êrişî gelê kurd dike û hewl dide doza kurd û hebûna kurdan tune bike.”  

Her wiha Rustem Bekir destnîşan kir ku dewleta Tirk a dagirker û PDK`ê li ser girtina deriyan û embargoyê li hev kiriye da ku Rêveberiya Xweser neçar bikin ku tawîzan bide.

Rustem Bekir piştrast kir ku gelê herêmên Bakur û Rojhilatê Sûriyê gelekî berxwedêr e û ji destpêka şoreşê ve, di gelek alozî ûkomkujiyan re derbas bûn lê têkoşîn mezin kir û destkeftiyên xwe parastin.

Di dawiyê de hevserokê Meclisa Navçeya Dirbêsiyê Rustem Bekir bang li PDK`ê kir ku bi planên dijminên gelê kurd neyê xepandin, embargo bi dawî bike, cenazeyên şehîdan radestî malbatên şehîdan bike.

(şx)

ANHA