Çima dewleta Tirk hewl dide Dirdara, Til Şinan, Um El-Kêf û Esediyê dagir bike?

Dewleta Tirk a dagirker û çeteyên wê êrişên xwe yên li dijî navçeyên Zirgan û Til Temirê yên girêdayî kantona Hesekê zêde kirin û bi dehan gundên her du navçeyan kirin hedef.

Lê herî zêde gundên Derdara, Til Şinan, Um El-Kêf ên Til Temirê, gundê Esediye yê li bakurê navçeya Zirganê bûne hedefa topbaranê.

Gundê Derdara stratejîk e, ji ber ku bi 4 kîlometreyan li bakurê navçeya Til Temirê ye û li ser rêya navçaya Zirganê ye. Girekî stratejîk li gund heye ku bi rêya wê dikarin rêya navneteweyî M4 ya di navbera navçeya Til Temir û Qamişloyê de bişopînin.

Ji ber wê dewleta Tirk û çeteyên wê bi hemû rêbazan hewl didin gundê Derdara dagir bikin, rêya navneteweyî li aliyê rojhilat qut bikin û naverasta navçeya Til Temirê dorpêç bikin. Bi taybet piştî ku rêyên bakur û rojavayê navçeyê ji ber topbaranê êdî nayên bikaranîn. Tenê rêya Til Temir û Hesekê tê bikaranîn.

Gundê Til Şinan jî li bakur rojavayê naverasta navçeya Til Temirê bi 2 kîlometreyan e. Bi 300 metreyan nêzî rêya M4 e. Ji ber wê bûye hedefa topbaranê.

Li aliyê rojavayê naverasta navçeya Til Temirê gundê Um El-Kêf heye ku tenê bi 4 kîlometreyan ji naverasta navçeyê dûr e û li ser rêya bajarê Serêkaniyê yê dagirkirî ye. Gelek gund mîna Til Cuma û Til Kêfçî nêzî vî gundî ne ku nêzî naverasta navçeyê ne. 

Li navçeya Zirganê dewleta Tirk a dagirker hewl dide gundê Esediye dagir bike ji ber ku li bakurê rojavayê navçeyê ye û derdora 8 kîlometreyan ji naverasta wê dûr e. Her wiha ji ber ku li aliyê rojhilatê rêya bajarê Serêkaniyê yê dagirkirî ye.

Ev gund gelekî stratejîk e, ji ber ku rêya gund a ber bi navçeya Zirganê ve di gundê Kesra re derbas dibe ku bi 10 kîlometreyan ji navçeyê dûr e û wek dergeha navçeyê tê hesibandin.

Gundê Kesra jî nuqteyeke stratejîk e ji ber ku li ser rêya di navbera navçeyên Serêkaniyê ya dagirkirî û navçeya Dirbêsiyê li aliyê rojhilat de ye. Li bakur jî herêmên dagirkirî bi navçeya Zirganê girê dide û nêzî sînorên Tirkiyê ye. Kontrolkirina wê tê wateya qutkirina rêya navçeya Dirbêsiyê li ser Zirganê ye.

Ji ber wê dewleta Tirk a dagirker û çeteyên wê hewl didin gundên Esediye û Kesra ji ber van sedeman dagir bikin.

(şx)

ANHA