Desteya Perwerdeyê vekirina peymangehên mamosteyan didomîne

Ji bo gihandina kadroyên perwerdeyê û li Bakur û Rojhilatê Sûriyê hejmara mamosteyan zêde bibe, Rêveberiya Xweser a Bakur û Rojhilatê Sûriyê li herêmên xwe peymangeheke nû ya mamosteyan vekir.

9`ê Kanûna 2021`ê li bajarê Hesekê Desteya Perwerde û Fêrkirinê ya Rêveberiya Xweser peymangeke mamosteyan, vekir.

Li herêma Cizîrê ev yekemîn peymangeh e tê vekirin û li herêmên Rêveberiya Xweser piştî peymangehên Reqa û Minbicê ev a sêyemîn e.

Li gorî hevseroka Desteya Perwerde û Fêrkirinê Kewser Doko, Rêveberiya Xweser bi vekirina van peymangehan armanc dike qada perwerdeyê bi pêş bixe û li herêmê zanisteke baş û perwerdeyeke profesyonel ava bike.

Têkildarî hewcedariya bi vê peymangehê hevserokê Peymangeha Gihandina Mamosteyan a Hesekê Azad Mehmûd axivî û got: "Ji ber ku pêwîstiya Desteya Perwerde û Fêrkirinê bi navendên gihandina kadroyên perwerdeyê hebû û mamoste baş werin amadekirin. Li hemû bajarên cîhanê dema encamên giştî yên bakelorya û encamên mufadeleyê derdikevin, hin xwendekarên ku pileyên wan rê nade wan ku derbasî zanîngehan bibin hene û ji ber vê yekê navên xwe di peymangehan de tomar dikin."

Peymangeh ji 7 beşên sereke pêk tên ku ew jî zimanê kurdî, zimanê îngilîzî, zanist (fîzîk û kîmya), wênexêzî, werzîş û matematîk in.

244 xwendekar li peymangehê hene û li ser materyalên Rêveberiya Xweser ên bi zimanê kurdî û erebî perwerde dibin. Di peymangehê de 25 mamosteyên pispor waneyan didin.

Azad Mehmûd piştrast kir ku Desteya Perwerde û Fêrkirinê ji bo peymangeh û zanîngehên xwe materyalên herî pêşketî hilbijartine.

Dema xwendinê li Peymangeha Mamosteyan 2 sal e û li ser 5 werzan hatiye dabeşkirin. Der barê mamostetiyê de Azad Mehmûd got: "Peymangeha Mamosteyan xwendekaran di hemû aliyên zanistî û pratîkî de amade dike."

Li peymangehê rêbazên herî pêşketî tên meşandin, rojane 3 semîner tên dayîn û sîstema wan jî li gorî werzan tê guhartin.

Xwendekara beşa zimanê kurdî Cahde Îso kêfxweşiya anî ziman û dibêje ew li ser tevlêbûna Peymangeha Mamosteyan gelekî kêfxweş e ji ber ku derfet jê re çêkir ku xwendina xwe berdewam bike, her wiha ji ber ku bi zimanê xwe fêr dibe.

Desteya Perwerde û Fêrkirinê ya Rêveberiya Xweser a Bakur û Rojhilatê Sûriyê li herêma Cizîrê dê peymangeheke din veke, lê dema wê diyar nekir. Bi vî awayî dê hejmara peymangehan bibe 4.

(eh)

ANHA