Egîd Qeremox behsa armancên êrişa dawîn li ser Eyn Îsayê kir

Artêşa Tirk a dagirker û çeteyên wê ji baregehên xwe yên li nêzî gundên Seyda û Kermaze bi çekên giran navenda navçeya Eyn Îsa û derodêr wê bi çekên giran û bi dijwarî topbaran dikin.

Di encama topbarana dijwar de zirarên madî gihaştin mal û erebeyên sivîlan, her wiha hin parçeyên topan li Mizgefa Nûrî ya li navarasta navçeyê û Nexweşxaneya Şehîd Omer Elûş ketin.

Ajansa me bi wêne û dîmen topên neteqiyayî yên li taxên Eyn Îsa û derdorê wê ketine, belge kir.

Beriya topbaranê, çeteyan ji derdorê gundê Seyda yê rojhilatê Eyn Îsayê hewl da bikevin herêmê, gundê Seyda dagir bikin û rê bigirin. Lê belê şervanên QSD`ê hewldana çeteyan têk bir û zirarên mezin ên madî û canî gihand wan. Hêzên Sûriya Demokratîk (QSD) bi daxuyaniyekê ragihandibû ku 8 çeteyên hewl dane herêmê dagir bikin hatine kuştin û 9 birîndar bûne.

Ji fermandarên meydanî yên QSD`ê Egîd Qeremox ji ajansa me re axivî û diyar kir ku dagirkeriya Tirk û çeteyên wê ji destpêka dagirkirina kantona Girê Spî ve, topbarankirina herêmên li eniyên şer û gundên sivîlan ranewestandine.

Qeremox wiha axivî: “Armanc ji êrişên di du rojên dawiyê de pêk hatine, dagirkirina gundê Seyda û qutkirina rêya M4 li tevgera sivîlan bû. Topbarankirina navçeyê û derdorê wê armanc jê belavkirina tirsê di nava sivîlan de û têkbirina aramî û îstiqrara herêmê bû.”

Egîd Qeremox di dawiya axaftina xwe de soza parastina navçeyê û têkbirina êrişan û planên dagirkeriya Tirk û çeteyên wê yên dagirkirina herêmên din ên Sûriyê da.

(cx)

ANHA