Meclisa Malbatên Şehîdan a Hesekê konferansa xwe li dar xist

Bi diruşma "Şerê gelê şoreşger em ê dagirkerî û faşîmza dewleta Tirk têk bibin" Meclisa Malbatên Şehîdan a bajarê Hesekê konferansa xwe ya 7'emîn li hola Silko ya taxa Xişman a bajar li dar xist. Bi sedan malbatên şehîdan, nûnerên saziyên civaka sivîl, partiyên siyasî, Kongreya Star beşdarî konferansê bûn.

Konferans bi deqeyeke rêzgirtin dest pê kir. Paşê dayika şehîd Hemze Tolhildan, Necah Dawud axaftina destpêkê ya konferansê kir û got, serkeftinên ku li Bakur û Rojhilatê Sûriyê hatin bidestxistin berhemên keda bi hezaran şehîdan û anî ziman ku malbatên şehîdan wê dev ji armancên zarokên xwe yên şehîd bernedin.

Necah Dawud destnîşan kir ku êrişên dewleta Tirk a dagirker û çeteyên wê yên li ser herêmê ji bo têkbirina projeya biratiya gelan û çanda gelan e.

Ji bo birêvebirina konferansê 5 endamên dîwanê; Mehmûd Cewad, Ehmed Esed Hesen Ubeyd, Bera El-Salih û Nesrîn Mirîî hatin hilbijartin.

Bi navê QSD'ê fermandar Salih Heyder jî axivî, şehîd bi namaye erd ji bo asîman bi nav kir û got: "Ev name wateyên pîroz li ser fedekariyên gelan ên li hemberî zor û zilmê hildigire."

Heyder diyar kir ku erkên wan ên pêşîn rizgarkirina herêmên dagirkerî di serî de Efrîn, Serêkaniyê û Girê Spî ne.

Bi navê PYD'ê Ebdulxenî Oso jî diyar kir ku gelên Bakur û Rojhilatê Sûriyê bi hevgirtina xwe û kombûna xwe li derdora projeya Rêveberiya Xweser li pêşiya berjewendiyên navneteweyî yên li hermê bû kelem.

Piştre rapora salên 2020 û 2021'an a Meclisa Malbatên Şehîdan ku ji rewşa siyasî, rêxistinî û xebatên meclisê pêk dihat, hate xwendin. Beşdaran nirxandinên xwe derbarê raporê de anîn ziman.

Di dawiya konferansê de hilbijartin pêk hatin, Selma Qasim û Xalid Darê wekî hevserok hatin hilbijartin û 15 endamên meclisê hatin hilbijartin.

(la)

ANHA