Komîteya Şopandinê civîna xwe ya asayî li Hesekê li dar xist

16 endamên komîteyê, hevseroka Meclisa Sûriya Demokratîk (MSD) Emîne Omer, fermandarê giştî yê Hêzên Sûriya Demokratîk (QSD) Mezlûm Ebdî, seroka Desteya Rêveber a MSD’ê Îlham Ehmed, hevserokê Meclisa Rêveber a Rêveberiya Xweser a Bakur û Rojhilatê Sûriyê Ebid Hamid El-Mihbaş di civînê de amade ne.

Tê payîn ku di dawiya civînê de, gelek pêşnûma werin pêşkêşkirin.

Komîteya Şopandinê ya Kongreya Nîştimanî ya herêmên Cizîr û Firatê di 30`yê Mijdara 2020`an civîna xwe ya yekemîn li dar xistibû û tê de 3 komîte ava bûbûn; rêveberî, aborî û ewlehî. Erka van komîteyan ew e ku kar û xebatên komîte û desteyên Rêveberiya Xweser bişopînin û mehê careke raporekê têkildarî xebatên xwe pêşkêş bikin. Komîte ji bo şopandin û nirxandina kar û xebatan û pêkanîna bendan dicive.

Komîte ji 16 endaman pêk tê. Tê de nûnerên rêveberiyên xweser û sivîl ên Bakur û Rojhilatê Sûriyê cih digirin. Erka wê şopandina pêkanîna encamên Kongreya Nîştimanî ya herêmên Cizîr û Firatê ye.

Tê destnîşankirin ku MSD`ê piştî lidarxistina 13 panelan li herêmên cuda yên Bakur û Rojhilatê Sûriyê bi armanca naskirina nêrînên aliyên siyasî û şêniyên herêmê têkildarî Rêveberiya Xweser û pêwîstiyên herêmê, di 25`ê Mijdara 2020`an de Kongreya Nîştimanî ya herêmên Cizîr û Firatê li dar xist. Zêdetirî 300 kesayetên sûrî yên ji herêmên cuda beşdar bûbûn.

(şx)

ANHA